A HUN TAKAH CHUAN KAN SENG DAWN SI A

Inthlan a hnai a, boruak pawh a sâng chho viau, a pui a pang, a tar a zûra kan buaipui leh kan titi khâwchâng ber pawh a ni hial awm e. A hunlai a ni bawk a, ṭan pawh a na viau, mahni ngaihdân lo zêldin ve chhên pawl lah awl lo. A sa lakah keini dai kil kâr, tu khawkhâin an ûk sâk vak loh pawh mahni ṭhuthmunah thingpui sen hâng dâwt pahin eng ti thei tak tak si lo hian, mahni ngaihdan kan lo pâwt kan lo pâwtpui ve bawk a. Kum dang ang lo takin ṭhalai politics buaipui thar kan tam a, kan harh chhuak kâwk kâwk mai hi thil hlû leh lawmawm tak a ni. Heng zawng zawng hi a ṭha lam zawnga thlir chuan harh tharna leh ram veina nun kan nei chho mek zel tihna a ni a, a lawmawm a, rah ṭha tak han chhuah ngei teh se.

Engpawhnise, tunlai politics boruakin kan rilru a luah a, sum leh pai kan buaipui châm chi mai chu a nih hi. 'Ber thla kan chuangkai a, kan hma lawkah Hunpuiin min hmuak bawk a, vawiin ni thlenga dam leh hrisel taka min hruai thlengtu kan Pathian pawh hi kan hre chang tawh lo emaw ni chu aw, tih turin Politics leh sum leh pai ringawt kan sawiin kan khelho dial dial chu a ni ber e. Chuvangin heng boruak a kârah heti lam zawng daih hian i han tuihnih ve teh ang. Pathian hi a ṭha êm a, kan chunga a zahngaihna leh dawhtheihna vang hian Amah faka chawimawi tur kan ni, A malsawmna kan dawn zawng zawngte hi kei zawng sawi loin ka awm thei si lo. “Kan thil hmuh leh hriat zawng zawngte hi sawi lovin kan awm thei lo,” Tirhkohte 4:20.

A ni lah tak a, Pathian remruat dan hi a châng chuan hriatthiam a har ṭhin kan ti vek awm e. Ni e, khawvela kan châm chhûng hi chuan lungawina tak tak hi a tuate mah hian kan nei reng lo vang. Nei loten neih ve an duh a, a neia ten neih belh leh zel an duh a. Ṭhalai lam aṭang chuan Hmelṭha leh pian nalhten, an hmelṭhatna leh pian nalhna an chhuang a, hmun chângkâng leh nuam tak taka an kalna te, an ei leh in an sum hmanna te, an hun hman dan leh awmna hmunte social media platform hrang hrangah te an post kual a, heng hi a ti ve thei lo leh nei ve lote tan chuan a awhawm takzet a. Tunlai ṭhalai tam zawk rilru tikal sualtu pawh a ni hial ang. A khawvel ang zawnga thlir chuan an duh leh an awh, ni ve thei, awm ve thei ila tia an duhthusâm pawh a ni ngei ang. Pathian hnênah an dil a, mahse chhânna an hmu si lo. An vui a, mahni insitna leh tling lo nia inhriatnate neiin, Pathian hian duhsak bîk a nei nia ngaite pawh an awm hial.

Amaherawhchu, heng zawng zawng hi Pathian duh dan leh remruat dan a lo ni ber lo a, Ani chuan kan hma lam hun atana ṭha ber tur leh kan dai sual palh lohna turin ro min relsâk a lo ni zawk. Hla siamtu pakhatin a tih angin; kan dil ang leh kan beisei ang diak diak hian malsawmna hmuin kan ṭawngṭainate chhân ni ta se, Pathian kan hnaih reng thei lo ang a, tin, min petu a ni tih pawh hre loin kawng dangah kan bosan hial thei bawk. Mahse chu chu Ani chuan a thlen phal loin kan tana ṭha tur leh kan mamawh tawk, kan mimal nuna kan zawh tawk leh kan phurh zawh tawk te tein min chhangin min enkawl thung a ni. Khawvela hming dai tawh lo tur, Nobel Peace Prize pawh lo dawng tawh - Mother Teresa chuan heti hian a ti, "Pathianin kan ṭawngṭaina a chhân lawk loh chuan nghâk hret turin min duh tihna a ni a, min chhân har chuan dawhthei turin min duh a, min chhân loh erawh chuan kan tan thil ṭha zawk a ruahman a ni,".

Kan rin loh lam aṭang daihin Pathian hian rem min lo ruatsak a, hmangaihna nun kan dil a, mahse hawtu tam tak min pe a, dawhtheihna kan dil a, buaina tam takin min chîm a, hlawhtlinna kan dil a, hrehawmna leh paltlang tur khirhkhân tak tak min pe a, kan ṭawngṭaina a chhâng reng hi a lo ni a. Min hawtute lo hmangaih chu thil awlai zawng a ni hauh lo. Amaherawhchu, kan Bible-in,“I hmelma hmangaih rawh,” a tih avangin kan hmelma leh min hawtute hmangaih thei turin Hmangaihna nun kan dil khan Pathianin hawtu min pe a ni zawk. Kan ṭawngṭai dan leh kan thil dîl dan fuh tâwk loh vangte, kan rilru sûkthlêk dik tâwk loh vang zawk hian Pathian hnênah kan vui ṭhin a ni.

Kan dil leh kan chhamte hi kan ngaituah chian a ṭul fo. Pathian engkim tithei leh kan tana ṭha ber tura min ruatsak leh min thawhsak theitu hian, kan duhna leh kan inpekna thinlung hi a duhin a làwm si a. Ngaihtuah chiang miah loa ṭawngṭai thu chham mai mai hi a awm ve thei a ni. A bik takin kan tana thil kan dilin kan hmasialna leh kan tana ṭha tur ringawt kan ngaihtuah ṭhin vangin, kan ṭawngṭaina a hlawhtling lo fo ṭhin. Pathian kan biakna leh kan pawlna a nih vangin thinlung leh tihtakzeta kan ṭawngṭai hi a pawimawh hle.

Bible chuan, engah mah mangang lo turin min zirtir a (Phil 4.6). Pathian thupek, Bible-a kan hmuh zawng zawng zinga zawm harsa ber pawl a ni hial awm e. He thu ziaktu Paula khan lung ina a tan lai, an thah tur hun a nghah mek laiin he thu hi a ziak a ni tih i ngaihtuah phei chuan, thil âwmang lo tak niin i ngai hial ang.

Manganna tih engthawl dan hi zir theih a ni a. Hmachhawn dan a zir theih a ni. Lal Isuan ti hian a lo sawi a, “Chutichuan, a tuk atan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni," (Matt. 6:34).

Nangmah i inen a, tling lo i inti a, mite angin i hausa ve lo va, mite hriat hlawh pawh i ni lo, hmel leh pian, ro sum leh paiah engmah chhuan tur pawh i nei ve lo a ni mai thei.Harsatna leh mangannain a tlâkbuak che a, mahni insit leh rual awt reng rengin hun leh ni i lo chhiar ve ṭhin pawh a ni mai thei e. Amaherawhchu, kan sawi tawh ang khan, engkim hi Pathianin kan hma lam hun atana ṭha tur vekin rem a ruat ṭhin tih hria la, Pa hmangaihtu chuan rual i awh a phal miah lo a nia. Ni leh Thla, Khawvel a la vir chhûng chu thil engkim pawh hi a la danglam zel dawn, engti angin nge a la hruai chhoh zel dawn che i hre si lo, I tan/kan tan kâwl a la eng dawn tih hi ring ila, kan rinna zawng zawng amahah kan nghah ngam hi a duh a ni.

Tin, kan chan tâwk zelah kan lawm thiam a ngai bawk, Lalpa chuan a thil neih ho te teah pawh a lawm thiamte apiang a lâwm a, pêk belh pawh a duh ṭhin. Bible pawhin 'LALPA ah chuan lawm fo rawh u, ka ti leh pek ṭhin ang lawm rawh u... (Phil 4:4) Lawm fo rawh u... (1 Thes 5:16)' tia a sawi angin keimahnia lawm turin min ti lo va, amah LALPAa lawm zel turin min ti zawk a ni.

Chuvangin kan malsawm dawnte hi chhiar thiam i la, i ṭawngṭai fan fan bawk ang u, Pathian chuan i chhiatna tur, i tana ṭha lo chu pek che a tum lo. Bible-in a sawi angin, nu leh pa mawl tê tê mahin an fate tan thil ṭha an ti ṭhin a nih chuan, Lalpa i Pathian chuan a ti dawn lo em ni? A duh zawngin, a hun takah, thinlung thianghlim taka i dil chuan, i ṭawngṭainate chu chhang tur chein a inpeih reng ngei ang. Lalpa Pathian chu ṭawngṭaina chhang tura inpeih reng, A mite au aw bengkhawn reng ṭhin Pathian a ni si a. Tin, kan inthlahdah loh zawngin a hun takah chuan kan seng dawn si a. Kan hun a la thleng lo mai chauh a ni.

“Engkim tân hian hun ruat a awm a, Vân hnuaia thiltih zawng zawng tân hun remchâng a awm,” Thuhriltu 3:1.

- Joel Laldinpuia Thlyutha,  Meisavaih west, Siaha