Puipun nikhuaa Mizote incheina

Ka hriat sual loh chuan kum 2014 KṬP General Conference dawn kha ni tain ka hria, Vanglaini lamah hian incheina chanchin kha ka chhiar a. A ngaihnawm leh bengvarthlak bakah zawm nghal theih thil tam tak a awm a, tun ṭumah hian KṬP General Conference a hnai a, Chapchar Kut hman a lo ni dawn bawk si a, mahni vei zawng sawi chhuak ila, tute tan emaw ngaihthlak hrehawm a nih palh pawhin tu tan emaw chuan ṭangkai a nih theih beisei vangin ka rawn thlasik mau puah ve phawng mai dawn a ni.

ṬKP Inkhawmpui kha Lawngtlai lamah an hman avangin kei chuan ka hre ve phak lova, Lunglei lama hmelhriat ka va zawt ṭalh a, ṭhianpa min hrilh dan chuan inkhawm kha a ṭan tirh zan aṭangin an nalh nghal hle a ni. Member zawng zawng sawina ni lovin ṬKP member zingah mipa lamin coat (blazer) an ha nasain necktie pawh an awrh a, hmeichhe lamin puan zeh hrang hrang leh pheikhawk sang nen zan khatna aṭangin bul an ṭan niin a sawi. KṬP lamah hei ai hian an la uar hret mai ang em aw ka ti deuh a, chu chu a tui hnih (water two!) duh lai tak chu a ni dawn a ni.

Tichuan kan thil sawi tumah han lut dawn ta ila, KṬP General Conference-ah Ningani aṭanga Pathianni thleng Mizo ṭhalai rual a sing telin an pungkhawm dawn ta, Ningani aṭanga Pathianni thleng han insuih ti-ti-ik reng mai leh inkam san em em reng mai hi i sim ang u, ka han ti teh ang kei misual KṬP active lo hian. Thil hi a hun leh hmun a awm a, puipun a nih tak avanga 'best dress' zawng zawng nen a zan khatna aṭanga thawh chhuah nghal hi thawmhnaw nei ve lo tan a inthlahrunawm bawk nen, inchei teh vur lo ang u, tih mai te hi kei misual sawi ve duh chu a ni.

Hmeichhia pawhin phei-khawk sang nen a zan khatna aṭanga dingdihlip reng mai hi an peih a ni bik lova, midang an inchei laia lo inchei loh bikte an zak a, chu vang mai mai chu a nia. Sunday bak chu inchei vur vur tawh lo se a ṭha ang, formal dress an tih ang hi chu kei Pathianni bakah hi chuan ṭhalai intawk khawm tan hian a ṭul ka ti lem lo a ni. Synod inkhawmpui ang maia KṬP hruaitu lamin necktie leh suit an han ha tluan chhuak zakte hi khawvel hmun dang ṭhalai zingah hian an awm pawh ka ring lova, inchei uluk leh inchei uarte pawh hi thliar hrang thiam ila a ṭha awm mang e ka ti ta deuh a ni.

Tichuan Chapchar Kut lam han sawi leh ta daih ila, tun hnaiah khuallian (Kut Pa) lamin thil awm dan an 'man' ta a, Mizo inchei dik tak angin an rawn inchei a, puan an rawn vengte hi a hmuhnawm. Ṭhenkhat chuan hetiang ni hi necktie awrhna tur emaw an rawn ti ṭhin a, official nih tak avanga kut (festival) hmang na na na lo inhak formal dress hi chu chhiar zau loh vang lam a ang ka ti zawk kei misual hian.

Chapchar Kuta kal tur tan kut hmang tura inchei a tawk a, Biak Ina inkhawm tur anga incheina chi a ni lo tihte pawh hriat a ṭha. Miss phuahchawp deuha lan ve hram beiseia pheikhawk sang nena kal tawkte an awm an ti lehzel a, a chhangchhiatthlak chu ka va ti si em kei misual hian.

Ka duh aiin ka ṭawngkam ka insum thiam lova, mi pawi ka sawi loh ka beisei a, khawvel hmun dang hi thlir ila, inchei uluk hun leh hmunte hriat a ṭha. Inchei uar hi nalhna chu ni se Mizote hi hnam nalh tak kan nih ka ring a, chutiang chuan mi hian min hmu ve si lo niin kei misual hian ka mumanga ka hmu tlatin ka hria.

- Mapuia R