Sorkarin lo hal hun sawn hla rawh se
Mizoram sorkarin kumtin March ni 15 aia tlai loah lo leh leipui hal vek turin thutlukna a siam ṭhin. Ram kang zel tur ven nan chuan a pawimawh viau a ni thei e. Mahse, kan hotute hian in dawn chiang lo a ni. Lo hal a, a kan ṭhat leh ṭhat loh hian chhungtlai kan thar dawn em? Buh leh thlai hrisel te, a thar tam tur thlengin a hril ṭhin.
Vahchap hi kang ṭha tur chuan a ro ṭhat a ngai a, ni sa-ah pho rei a ngai em em a ni. Ruah in a nan loh pawhin March 15 hi chu a hma mah mah. Vahchap char hun nghakhlel taka kan thlir laiin, tunhnai ruahsur khan zawr vek khawpin a nan ta si. Kang ṭha tur khawp chuan a lo berah chawlhkar li dawn nisa hnuaia a awm a ngai ang. Chuvangin, lo hal hun bituk March 15 hnu lama hal hi sorkarin min phalsak rawh se tih ka ngen duh a ni.
Loneitute hi media/ social media-a aw kan chhuah ve ngai loh vang hian em ni min palzut bik em em ṭhin? HSRP, suncontrol, sumo stand sawn chhuah, etc kawnga sorkarin hma a lak dawnin media hmangin an auchhuak chuah chuah a; tunah phei chuan sun control pawh bel a ni tawh lo. Sun control hi bel ni rawh se ka ti hauh lo, mahse auchhuak an awm hleka sorkar a inphahhniam fo laiin tlangram loneitute chu vahchap char ṭhalo pawh hal luihtir kan ni fo mai. "Kan VIP" tia thlavang min hauhsak ṭhintute hian kan bianga thlantui luang hi min belhchhah sak lul suh u.
Lo kang ṭha loah chuan hnim (harte) ṭiak a tam a, kang ṭha deuh se tha 100 senna tur angah khan a kan ṭhat loh vangin tha 200 te sen a ngai ṭhin. Lei a hmin lo a, buh leh thlai a ṭiak ṭha loa, a ṭiak chhun pawh a hrisel lo fo. Ram ṭha deuh neih kum pawh nise beisei ang buh leh bal thar siloin, hah zetin kan thawk fo tih hi min hriatpui teh u.
Ram kang hi kan palzam a ni lo, a tuar bertu kan nih avangin mahni ram chhung kang hi chu kan vei hle. Ram kang chuan lo neih tur a tichhia a, kangfimah buh leh thlai a ṭhat theih lohzia pawh kan hria. A thuhrimah Kangmei Venna Hapta te hi thingtlangah a hawn-na te rawn nei ula, Vanapa Hall chhungah kawrchung nena ram kang pawizia sawite chu a harsa vak lo ang.
Keini chuan zing, chhun, zan pawh nise ram kang ṭhelh-in kan chhuak fo tih hi ka sawi duh a ni. Chuvangin lo hal hun bituk March 15 hnu lama hal hi sorkarin min phalsak rawh se
- Loneitu Fapa, Valtea Fanai