AMC Office-ah Councillor ten hmun chang ve se
Mizote Jerusalem tia kan sawi ‘Aizawl khawpui’ ti hmasawn leh enkawl tura Aizawl mipuiin hmanni lawka kan thlan chhuah tak Councillor 17 te hian tunah hian Aizawl Municipal Corporation (AMC) office Ṭhuampuiah ṭhutna an la nei lova.
He hmunah hian sawrkar hnathawk za chuang teh meuh awm mekte hian ṭhut hmun an nei vek a, mipui thlan lal zingah Mayor leh Deputy Mayor chauhin office ṭhut hmun an nei thung.
Aizawl khawpui cheimawi leh siam ṭha tura kan thlan chhuah Councillor te hi mipuiin dan siamtu tur ringawtah kan ngai lova, khawpui cheibawla a chhiat leh ṭhatah mawhphura rorel turin kan beisei a ni. Bial (Ward) mipui hian veng chhunga harsatna hrang hrang sawipuia chinfel sak turin Councillor te hi kan phut a. Bial chhung piah lam bakah bial pawn lam mipui thlengin an hnenah dilna hrang hrang an thlen fo a ni. Heng mite lo dawng sawng tur chuan AMC office-ah ngei hian Councillor-te hian
ṭhut hmun an rem a pawimawh hle.
Mipuiin an duh hun hunah office hun chhung ‘working hour’ ah Councillor te hi an hmuh theih ngei a ṭul a. In lam leh a remchan dan ang ringawta anmahni dawr tura in pan hi remchan lohna tam tak a awm. Councillor te hi an hun awl neih dan a inchen lo fur ang. Mamawh hun apiangah Councillor te hi dawr theiha an awm a pawimawh. AMC office-ah Councillor te hian inbunna hmun an neih loh chuan mipui heti zat dawr turin Mayor leh Deputy Mayor ringawt chu an indaih seng lo hle bawk ang.
Tunah hian AMC office floor khat a ruak a, heah hian Councillor zawng zawngte hian ṭhut hmun nei vek se mipui tan a remchang hle ang. Councillor te hi an Ward chhunga mipui nen an indawr tawn reng a ṭul a, hmunhma an neih ṭheuh hi AMC tan a samkhai phah hle ang.
Kan sawrkar hian ngaihtuahna hmang thuai teh se.
- R.Lalhmangaiha, Bethlehem Veng