Midang tana malsawmna

Mizoram Cancer Care Foundation-a ka hmelhriatho chu cancer natnain an taksa a tihbuai ṭawng chhuah harsat tak tak te, sam tlakawlh te, hmai tuam ngai reng te, an chhungte anmahni hmangaihtu leh an hmangaih ngawih ngawih cancer natnain a tlakbuak te an ni hlawm a. Cancer natna tuar ve lo tan chuan natna tuartute chu an va khawngaihthlak hlawm ve aw kan ti mai thei. An khawngaihthlak hlawm reng bawk a.

An taksa hmuh theih leh hmuh theih loh ah harsatna hrang hrang tuarin hreawm ti hle mahse an rilru erawh natna tuar lo te aimahin a fim a, midang duhsak kawngah te, midang hriatthiam kawngah te chuan entawntlak khawpin an rilru a ṭha thung. Ṭawngkam mawi leh hawihhawm zawng khawmawi vak lovin min be ṭhin mahse induhsak hunah chuan an thilphal em em thung. Anmahni ṭawngkam takin ‘khawvel mihringah hian huat ngawih ngawih lo nei palh pawh ni ila cancer natna tuar turin ka phal lo ang” tiin.

Mizoram sorkar hnuaiah registration fel tak neia pawl ding an ni. Taksa chak lo te te an nih avangin pawisa thawhchhuah kawngah leh an member pui damlo harsa zual ṭanpui kawngah te tih theih vak an nei lova, an hmachhuan ber chu Ṭawngtaina a ni. Thla tin chhung inkhawm (member zawng zawng huap) an nei ṭhin a, an in ṭawngṭai pui tawn liam liam ṭhin. Social media hmang ṭangkaiin facebook group an siam a, hre chiang duh chuan tlawh nise https://www.facebook.com/group...;

Cancer natna tuar enkawl tur hian sum leh pai tam tak sen a ngai a, damdawi leh inenkawlna man a to em avangin pawisa puk chawpin damdawi kan lei a, kan inenkawl ṭhin a nih hi. An chhungte cancer natna avanga an boral palh hlauh a nih chuan man to tak taka an lei damdawi leh chaw
ṭha chi hrang hrang ei/ hman loh zawng zawng kha cancer natna tuar mek enkawl nan a ṭangkai dawn a ni tih hriain an hmelhriat leh hmelhriat loh thleng pawhin a thlawnin an pe ṭhin. Cancer natnain an chhungte nunna a laksak avanga cancer natna do kawnga hmalatu ṭangkai tak pakhat nih tuma penchhuak an awm bawk a, cancer natna thlentu nia kan hriat langsar zuk leh hmuam sim phah hmak pawh an awm.

Natna tura ngai lo khawpa hrisel kan awm a rinawm lo a. Kan damchhung hian natna avangin mahni in lamah emaw damdawiinah kan inenkawl ṭheuh a rinawm. Kan natna leh harsatna chu engpawh ni se damdawi lama mithiam zawk rawn nachang hriat hi a finthlak in a tunlai hle a, rawn tawp aia pawimawh zawk chu dawmdawi min chawh dan te dik taka ei a in hi a ni.

Thihna leh natna in a kal kân chhungkua a awm theih loh avangin engtik niah emaw chuan natna leh thihna in kan chungah ro a la rel dawn. Thihna in min run chang hian natna damna tur leh hreawm tawrhna chhawk zangkhai tura doctor te’n damdawi min chawh kan lei khawl sa damlo in a ei hman tak loh ṭhahnem tak a awm ṭhin a, hetiang damdawi hi kan hnaih ber damdawiin ah emaw damdawi lama mithiam hnenah pe ṭhin ila, midang tan malsawmna thlentu kan ni thei dawn a ni (hetianga ti ṭhin chhungkaw tam tak an awm).

Thih hnua taksa bung hrang hrang midang tana pe an awm ṭhin a, hetiang hi a remchang lo a nih pawhin kan damdawi leisa kan hman loh mamawh ngawih ngawih damlo harsa ve tak tak an awm thei tih hriain damdawiinah emaw damdawi lama mithiam hnenah damdawi dam lai (expire hma) ngeiin pek nachang i hria ang u. Midang tan engti kawng zawng emaw tala malsawmna thlentu nih a ṭha si a.

- Zonunmawia Fanai