I DUH BER THLANG NGAM RAWH

Mahni Mimal duhthlan ngei, kan chunga roreltu tur kan thlanchhuahna hi Democracy lungphum pawimawh tak chu a ni. Mahni ngaihtuahna fim tak ṭheuh hmanga Vote kan thlak hi a hluin a pawimawh a ni.

Mahni In chhung khurah rilru fim tak hmangin mi ṭha thlan tur kan ngaihtuah fel tawh a, pawnah kan chhuak a, mi tute emawin chu chu a ṭha tiin min hrilh a, tlai lamah chuan Politic tuinuah kan rilru a inchiah leh ṭhin. Mahniin ngaihtuahna fim tak kan hman chu tute emaw hruai kawi theihin awm lo ila, huaisen takin kan dikna (Right) ṭheuh hi vote thlak ni thlengin vawnghim thei ila, Democracy kalkawng dik chu kan zawh chhuak thei dawn a ni.

Party chhung aṭang chuan he ngaihtuahna fim leh zalen hi neih a har ṭhin a, kan awmna Party pawn lama awm, mi ṭhate chu va hre mah ila, kan awmnaah an lo luh dawn loh chuan kan fak duh ngai lo. Ram changkangah chuan mahni duhthlan ngeiah vote thlak an tam laiin ram changkang lovah chuan retheihna avangin mahni duhthu kan dah lal thei ṭhin lo. Mi ṭha thlang chhuak tur chuan neutral rilru kan put a ngai fo ṭhin. Party chhunga awmte aiin Neutral te hian mi ṭha chu an hre chiang zawk. Party chhunga awm chung pawhin Neutral rilru pu chhin la, chuta ṭang chuan mi ṭha lo paih chhuah turte, mi ṭha lakluh turte kan hre thei ang.

A bul ber ngaihtuahna fim kan hman theih loh chuan ramin a mamawh mi ṭha kan thlang chhuak thei ṭhin lo. "Tu nge ṭha ber ang?" tia suangtuahna kan hman laiin kan awmna Party chhung boruak aṭanga thlir mai lovin, pawn lam aṭanga thlirtute ngaihtuahna pawh kan va ṭawmpui a ṭul ve bawk. Mite sawi thiamna maiah i ngaihdan chu innghat lovin i mimal ngaihtuahna fim ngei chu hmang ṭangkai la, vote thlak thei khawpa mi puitling i nihna kha hre rengin nangma duhna ngei chu dah lalin ngai pawimawh zawk ang che.

I duh ber i thlan khan tu m'a sawisel theih i ni lo. I Vote hlu tak khan Ram a siam ṭhain a tichhe thei a ni tih hre rengin, i ngaihtuahna chu lo hmang nasa ang che.

- H. Neihchungnunga, Durtlang North