AMC leh an pawisa hman ral zozai

Aizawl Municipal Corporation ah hian party tin hi an sorkar vek tawh angin a sawi theih a, AMC term hmasa khan an in sorkar chhawk sup sup tawh bawk a. MNF in sorkarna hun an hmang zo leh ta bawk a, kan party neih te an sorkar kim vek tawh a tih theih a ni. 

AMC-ah hian pawisa a tamzia hi Aizawl mipuite hian kan chhut mang miah lo. A tira kan ngaihdan leh sawi duh dan, "AMC chu VC u awrh an ni," tih kha thil kan hriat loh em avanga kan sawi a ni. AMC hi VC u awrh ni lovin Minister ṭhenkhat hna chanpual mawm vak lo ai chuan AMC lama ruling hian pawisa an khawih hnem zawk hial awm e tiin a sawi theih. 

Sorkar department chuan an pawisa neih hi hnathawktu hlawh leh office inenkawlna atan an hmang tam em em a, AMC chuan hnathawhna sum tawp an nei a ni.

Kan Councillor-te pawh an hausa awk awk tih chu phat rual a ni lo. AMC Councillor nih hma leh nih hnu lama an khawsak dan kan hmuh vek avangin inthup theih a ni lo. A hma aiin an khawsa nuam ve deuh tawh hlawm a ni tih mipuiin kan hmu thei a ni. 

AMC lama kan Councillor hian nuai biin YMA leh MHIP, MUP etc an ṭanpui pawp pawp thei a, chu bakah Ambulance te chhiah tling khawm aṭangin an lei pawp pawp thei asin - pawisa hi an ngah teh a nia aw... Aizawl mipuite u.

Chutih rual chuan AMC hian contract tenau sem a, lungrem, luikawr siam, footpath siam, step rem vel mai mai tawkah inngaiin sum hlawm lian tur chu an chawk te veka an han sem rual ta a, hmasawnna ruhrel lian (infrastructure) din si lovin pawisa hmang zo siin an term an hmang zo ta hlawm a ni. 

Mi state khaw­puia Municipal Cor­poration te chu an state sorkar aiin khawpui siam leh cheina atan an thawk hlawk ṭhin a, Aizawlah chuan pawisa tam tak khaw­h­ral siin party inhlawh­na atan, YMA leh VDP tlawnna sum atan, vote zawnna tura contract tenau atan kan sem sawm mai mai tih tun hnai kum 10 chhungin kan hmu hi a pawi a ni.