Aizawlin inchei vak kan tum lo a nia!
KṬP General Conference Khaw-zawla neih dawn khan chanchinbuah incheina khan sawi a hlawh khawp mai a. Kha khan awmzia a neia ka hriatna chu mipui nawlpuiin zawm lo mahse ṭhalai tam tak khan Sunday a thlen hma kha chuan Sunday dress hmanga lo inchei ṭup kha a ṭulin an hre lo a nih ka ring a, thawmhnaw ṭha ber bera inchei lo ka hmu nual mai Khawzawlah khan.
Champhaiin KṬP Conference a thleng dawna incheina velah hian thingtlang lam hi an buai ṭhin a, an huphurh ṭhin niin an sawi a; ka sawi ve duh chu Aizawl khawpui ṭhalaite hian inchei vak an tum dawn loa lo inchei vak duh bik suh u.
Sunday-ah chuan Sunday dress an rawn ha chhuak mai ang a, a bakah hi chuan inkhawmpui tura zahpuiawm lo tawkin necktie, coat leh pheikhawk sang leh puanzeh leh puan ropui an rawn thlawh chhuak vak dawn lo. Simple deuha awm hi an thlang tawh zawk dawn a, incheina velah khan in lo buai lutuk palh ang e - Aizawl zawk hian inchei vak an tum dawn lo niin a boruak thlir hian a hriat theih a ni.
Pawn lam langthei incheina changkan hmel leh to tak takte hi mihring changkan leh changkan loh tehna tling a ni lo hrim hrim. Changkanna dik leh tlo zawk chu mahni intodelh ṭhalai ka ni em tih lam hi a ni zawk mah awm e.
Pathian biak nan chuan kan thawm-hnaw neih ṭha ve pangngai hi a tawk mai. KṬP conference vanga a ba thlaa thawm-hnaw lei a, chhung-kaw tana har-satna thlentu
ṭhalai nih phei chu kan khawmpui neih chhan Lal Isua duh dan pawh a ni lo hrim hrim.
Tin, mihring zah-awmna hi pawn lam lan dan aṭanga teh chi a ni lo bawk. Mi i teh dawn chuan a kawr hak leh a pheikhawk brand aṭanga teh loin a chhungril mawina aṭangin i teh zawk dawn nia.
Ṭhalai kalkhawm tur kan ni a, thlarau lamah in khawmpui ropui tak a nih rualin kawppui tur zawn nan pawh a remchang viau tho mai. Kawppui tur zawn chungchang hi ka han zep hlek duh a. Kawppui tur i zawng dawn a nih ngai chuan Concert-naah te, Chapchar Kut-ah te, YMA Conference-ah te ni loin, KṬP Conference-ah te hian zawng la a fuh zawk ngei ang.
Mi i teh dawn a nih chuan pawn lam lan dan aṭanga i teh chuan nakinah i tan inchhirna zakhaw thlengtu a la ni ngei ang. Pawn lam mawi-na leh incheina phen-ah hian ngaihhlut tur dik tak chu a awm e.
- Pekhlua, Aizawl