PU LALDUHOMA leh MINUS 9%
October 24, 2023 (Thawhlehni) zana ZONET Cable TV-a ZPM leader Pu Lalduhoma live-a an kawmnaah khan Mizoram economy ṭhanna rate chungchangah zawhna zawttu Pu Muantea nen an hriat dan a inan loh avangin an inhnial deuh a. A tu emaw zawk zawk dâwt sawia puhna social media-ah a tam tâk viau avangin thil nihna tak ka hriat dan i'n sawi ve teh ang.
Pu Lalduhoma'n a ṭan chhan kha Mizoram budget document/RBI statement a nih thu a sawi a; chu chu Fiscal Policy Strategy Statement-ah tarlan a ni. FPS Statement-ah chuan, Mizoram GSDP aṭanga economy ṭhanna leh ṭhanna tur (actual/assumed growth rate) tarlan a ni a, Mizoram economy ṭhanna percentage (rate) chu hetiang hi a ni.
2020-21 ah +9.71% (Actual)
FY 2021-22 ah -11.28% (Actual)
FY 2022-23 ah +52.96% (BE)
FY 2022-23 ah +17.16% (RE)
FY 2023-24 ah -9.01% (BE)
FY 2024-25 ah +20.34 (Proj.)
Pu Lalduhoma khan economy ṭhanna a sawi -9% kha sorkar kum kal mek 2023-24 a nih thu chiang takin a sawi a; chu chu a chunga figure nen a inmil thlap a ni. Kum danga mite pawh a chunga figure tarlanah hian a chiang mai àwm e.
Pu Lalduhoma khan actual, BE, RE, tih vel a sawi lêm lo a, financial year kal mek a ti mai a, FY kal mek chu 2023-24 a ni. FY kal mek a nih chuan actual leh RE a ni thei lo hrim hrim tih hriat sa a ni a, BE a ni tih a chiang nghal bawk.
Chuvangin, Pu Duhoma'n FY kal meka growth rate -9% a ni a tih kha a dik thlap. Chhût lâwkna a ni a, Mizoram dinhmun dik tak a la ni lo tih erawh kan hre tlangin a rinawm. Kum hnih vel a liam ang a, actual hriat a nih hunah chuan kan minus kher lo thei a, kan minus a nih pawhin -9% kher a ni lo thei bawk.
Pu Muantea khan stats/figure dik sawi mai thei si loin, 'A ni thei lo' a ti leh ngawt ṭhin a; a rilruah dik thei loin a hre si, figure sawi mai thei si lo niin a lang a, an inhnial deuh titih tawh si a, ka lo ṭang ru viau mai. Pu Muantea ṭanna kha a àwm ve tho mai a; a chhan chu, thil nih dan tur pangngaiah leh kan state kal tawh dante ngaihtuahin, economy hi tlahniam lo a, tlemtê tal pawha ṭhang tur àwm tak a ni ve tlat a ni.
BE = Budget Estimate
RE = Revised Estimate
Proj. = Projection
- K Zothanpara