ZPM Phurrit (An sawrkar chuan)

Kumin kan inthlang tur chu a chichawmin a ngaihnawm khawp mai, zawlnei in-candidate tur kan neih laiin a zawl rawngkai thovin vote thlakte chu an thlakna hmunah an nunna a tàwp ang a ti hmiah bawk a. London aṭanga Pathian Lalram din tur an lo haw vang vang bawk a, bathroom sil laia Pathian aw hriaa nomination file zui ta an awm bawk a. Heng zawng zawng ngaihtuah hian, ram hruaitu thlan hi kan la na hle tih hi a ni.

Bible kan keu chuan Genesis bung 37 aṭangin Josefa chanchin kan hmu a, Josefa chanchin hi sermon thlaktute hian an hmang rim khawp mai, a chhan ni awma lang chu, sex-ah a tlu lo kha a ni. Josefa hian thil ropui tak a tih aiin a tih duh loh hian a chanchin a timawi zual a, Potiphara nupuiin vawi tam a thlem a, chuti chung pawhin a dai pelh lo a ni. A tih duh loh hi tunlai chhuante entawn atan thuhriltuten an sawi chamchi a ni, Nehemia chungchang hi kan tuipui viau bawk a.

Zoram dinthar lehna lam sawi a nih chuan Nehemia hi a thlauhthlak theih loh, I dinthar leh ang u kan tih tawh chuan Nehemia a lo lang nghal chat ṭhin. Nehemia ṭhahnemngaihna chuan Israel fate thinlung chawk thovin, kut leh lamah ralthuam kengin kut leh lamin hna an thawk a, Jerusalem kulh chim tawh leh a kawngkhar ût rem rumte chu hun rei lo te chhungin an dinthar leh a ni. Nehemia testimony ropui tak kan hriat fo chu, Pathian a ṭih avangin a hmaa roreltute angin a hautak ve lo va, a duham hek lo. Nehemia ropuina em em chu “ka ti ve lo” a tih hi a ni.

Kan ram hian kum tam tak chhung roreltu duham leh hautak takte a lo hrawn tawh a, mi rethei lu chunga vaivut tak ngial pawh it khawpa koham; MLA tam tak a lo chawisang tawh a. Mipui zahna reng reng nei lo ram hruaitu, vana arsi zat zet BPL-a Zoram mipui chhuahtute thuhnuaiah ram hi hun rei tak a lo kûn tawh a, tisa thlarauva mipui sawp zawitute zarah State azawnga rethei ber kan lo ni ta a ni. Miin kan ram kalphung hi zan mumangah nei se, a mumang chu mangchhia a ni ang, miin mangchhia a mang a nih chuan a khumlaizawlah a rúm chhuak ṭhin. Roreltute zar zo ve pha lote mangchhia chu mi tin hriat theih khawpin a lo rúm chhuak ta a, chutiang taka ram mipui rúm ri chuan Politics-a mutthlu mi ṭhate a kai tho ta a, Politics-ah thlir dan thar leh harh tharna a lo thleng ta a ni

Harh tharte chu tute nge? ZPM em ni? Ni lo, veng tin leh khaw tina Party ruihchilh lo, chhia leh ṭha thiang taka hmanga vote thlak duhtute hi an ni. Hetianga harh tharte huikhawm tura ‘FIT’ inti chu ZPM hi an ni, hnehna chan theihnana “KA TI VE LO VANG” tih au chhuahpuitute an ni.

Roreltu hmasate hlawkpui ang, thawklehkhata hausak thutna leh hleih neia rorelna ang chi reng reng chu kan ti ve lo vang titu; ZPM hi an inngaihtuah chiang em? Mipui hnehnan kan ti ve lo vang an ti mai em? Tunah hian ZPM hi an tláng a sang hle tawh a, phih thlak hleih theih loh dinhmuna dingah an inngai mek a ni. Mipuiin beiseina neiin, an tih ve dawn loh chuan kan chawikang mai tur a ni tiin kan insawrbing mek a ni. Ralmuanna tlangah sawi mai awl mah se tih ang deuhin, tunah chuan tih ve loh tur chu sawi a la awl khawp mai. Mahse, thuneihna an chelh a nih ngai chuan ZPM-a mi rilṭamte an hmachhawn dawn a ni. Party workers-te lakah kan ti ve lo vang an tih hi a tak ram a thleng zo emaw chu?

Chuvangin, he Political Party ṭhangduang tak hian phurrit (burden) a insiam a ni. Tun dunhmunah kan Political Party palian pahnih INC leh MNF-ah mipui beidawnna a awm, beidawnna ata hruai chhuak turin ZPM-ah beiseina nung neih mek a ni. Mipui hian kum 5 chhung beidawng leh khawro taka kal hi kan peih tawh lo, chuvangin tuna mipuiin kan nin em em ramhlui zia hi nuai bo turin ZPM kan beisei. Mahse tih hi awm tlat, ZPM hian kan ti ve lo vang an tih hulh hulh hi an ti leh si a nih chuan; kan ram chu thim thuah sarih aia thimah kan lut dawn a ni. ZPM hian phurrit tak an phur a ni.

Thil ṭha lo tih loh chu phurrit a ni em ? Thil ṭha lo kalsana thil ṭha tih hi thlarau lam nunah pawh a harsa lai chu a ni. Piangtharin a tih ve rem tawh lo hi a hlawk leh nuam hlir a nih avangin, kan tlu leh phuk phuk ṭhin a nih hi. ZPM hi Kutfai rual awmkhawm an nih kan beisei, Party worker ten tunhmaa mite angin an pute lakah beisei an nei thiang tawh lo. ZPM MLA te chu mahni duh ang anga tal a rem dawn lo va, Super CM hnuaiah mai ni lovin VUC hnuaiah an awm tih an hriatreng a ṭul dawn a ni. Chhungkhat laina uchuak taka duhsak te, ṭhianṭha duhsakna uchuak taka lantirte chu a rem tawh dawn lo, 'nepotism' in nunna a nei tur a ni lo. Engkim mai hi dik tak leh fel takin an kalpui dawn a ni, sawi tur a va tam em! Heng zawng zawng han ngaihtuah hian ZPM hian tih loh tur a va ngahin a va rit dawn. Mipui hian nuai thum sem tur ai chuan, kan ti ve lo vang tite hi kan duhsak zawk dawn niin a lang. Kan ram rorelna leh thuneihnaah hian a ṭha lam chu phurrit a ni ta hial mai!

ZPM manifesto hian sawi a hlawhin chiptu pawh a ngah hle, chuvangin an lo sawrkar a nih chuan um zui hlawh em em tur manifesto a ni tih an hriat a ṭul khawp ang. Ram mipuiin an chakna (Potential) kan la hriat loh Party an nih avangin beiseina sang tak nen kan thlir a ni. Manifesto hi chu ruahmanna fel tak nei a duan ṭhin a ni a, sawrkar tan chuan a hlawhtlinna kawng zawhpui hi a har teh chiam lo. Mahse, kan sawi tak angin a har lai chu 'tih ve loh' hi a ni, ZPM an sawrkar chuan a thawka phita ‘restricted tender’ tih fote hi a reh tawh dawn a nih chu. Ka ti ve lo vang tih hi nuai thum sem ang chauh a nih chuan ZPM hian mipui mai ni lovin, Pathian ngaihah pawh sual lian tak an puitlin a ni ang.

- Rosangzela, Vh, Ph: 8974138026