Motor chhiah tihsan nghawng tur chu

Sorkarin an Term hmasaah Motor-a eizawngtute chhiah a tihsan chu an term hnihnaah Commer-cial Vehicle Tax a tisang leh ta.

Tunah phei chuan Road Tax, Plying Permit Renew Fee, Passengers & Goods Tax, Special Road Permit etc a tihsan mai duh tawk tawh loin LifeTime Tax a la zui dawn a, lirtheia eizawng tan chuan chawi a tam dawn hle a ni.

Hei hian a rawn nghawng tur chu bung-raw phurh man leh passenger-te motor chuan man pawh a to dawn tih mipuiten kan lo hriatsak a ngai. Thil dangah pawh chhiah tihsan chuan thil to hi a kaihhnawih ṭhin. Sorkar chhiah tihsan hi in-direct in motor neitute kaltlangin kan chawi ve a ni.

Sorkar pawhin motor neituten an rate an tisang a nih pawhin an pawm ve mai tur a ni. Anni pawhin an tisang miau si a, midang tisang tur khap sak leh si chu thil dik lo tak a ni ang.

He chhiah tihsan vang hian Sorkar zemah cheng vai-belchhe tel a luh phah dawn a, hei hi mipuiten lirthei kan hmanna aṭangin kan thawhkhawm dawn tihna a ni.

Heng chhiah duh vang hi ni maw Commercial Vehicle Permit ngai chi Permit lah an pek belh reng a, motor a tipung nasa a, an tam tawh avanga kawng leh parking pawhin a dawl lohzia hretu chu Sorkar a ni. A hnua hnawksak ti em emtu lah a petu sorkar tho a ni lehnghal; dem tur chu Sorkar bak a ni lo.

Chuvangin, lirthei chuan man rate a lo to ve leh a nih pawhin lirthei neitute dem mai loin, a tisangtute leh Permit petute mawhphurh a ni tih i hre tawh teh ang u. Hemi vanga buaina leh harsatna a thleng ta a nih pawhin Sorkar mawh tho a ni.

- Lalduhsaka