CHAPCHAR KUT

Chapchar Kut hi Mizo Traditional kut dik tak a ni. Hman aṭanga vawiin thlengin Chapchar kût hian Mizote ngaihhlut a hlawh hle a, Mizo kût zinga uar ber leh hman hun chhung rei ber a ni. Mizoten kan pi leh pu te chin dan leh zia kan phochhuah theihna hun remchang ber a nih bawk avangin a hman danah pawh hian kan pi pute kha an fimkhur hle. Hetih lai hian hun lo inherliam zel chuan Chapchar Kut kan hman dàn pawh chu a rawn her danglam chhohpui ve hret hret zel.

Kum 1974 a lo inher meuh chuan Art & Culture Department hial te kan sorkarah a lo piang a, kum 1981 aṭang khan Chapchar kût hi kum khat chhunga ‘tih tur’ pawimawhte zingah a dah a ni. State Level Committee a din bawk a, kum 1981 aṭanga kumin thleng hian Chapchar Kut hi Mizoramah March thlaah lawm ziah a ni. Mizoram chauh ni lovin, India ram chhunga Mizo awmna leh India ram pawna Mizote awm tamna hmun dangah te pawh Chapchar Kût hi hman ṭhin a ni.

Chapchar kut hi Mizo pi pute nundan leh chin dan hrang hrangte leh hmanlai hun tarlang thei zawnga ṭhangthar leh kan naupang zawkte hrilh hriatna hunah hman tur a nih avangin a theih chen chena Mizo thei ang bera hman ni zel se. Kan pi leh pute hunlaia an hman dan ang khan hmang Mizo takin hmang ila mipui nawlpui rilruah he Kut hi a hlu zual sauh ang a, hnam dang mi tan pawh en chakawm tak a ni ngei ang.

Chapchar kut tunlaia kan hman dan erawh hi chuan duhthu a sam meuh tawh lo niin alang. Tunlaia Chapchar Kut kan hman dan tam zawk hi chuan kan Mizo Society leh Culture rapbet ta lek lek niin a hriat. Kan duh ang zawng zawngin kan kan her danglam a, hmanlai anga lantir tum si, intih changkang tum bawk siin kan hmang a. Chapchar Kut hlu tak mai hi tunlai changkanna tuipuia a pil bo hma ngei hian Mizote hi harh chhuak ila. Chapchar Kut hi enge ni a, eng vangin nge kan hman ṭhin tih hi ṭhangtharten awlsam leh chiang taka an hriat theih nana document siamsak hi Chapchar Kut kan hman chhan ber ni thei se a duhawm hle mai.

Mizote Kut hlu tak Chap-char Kut hi tih changkan vak emaw chi a ni lo a, zaithiam larte an zai leh zai loh avanga hlawhtling leh hlawhtling lova teh ngawt chi a ni hek lo. Isua nen Chapchar Kut ti ṭhin mah ila, hunserh hman lai bak kan Lalpa tan hun leh hmun kan pe chuang lo bawk a, Pathian thu nena kaihpawlh phet tum a ṭul lo bawk.

Mizo nih tihnuamtu, Mizo Traditional kut dik tak leh Mizotena kan kut neih hlut ber, Mizoten kan pi leh pu te chin dan leh zia kan phochhuah theihna hun remchang ber a ni a, vawiin thlenga Mizo hnahthlakten inkungkaihna ṭha zawk kan neih theih nan te a kan la hman zel a, kan hlut thiam a pawimawh a. Kan Mizo Kut ropui ber Chapchar Kut hi enge ni a, eng vangin nge kan hman
ṭhin tih hi ṭhangtharten awlsam leh chiang taka an hriat theih nana document siamsak hi Chapchar Kut kan hman chhan ber ni thei se a duhawm hle.

Chutianga Mizo taka he kut hi kan hmang a nih ngat chuan a hmuna thlir peih kan tam lem lo a nih pawhin ramdang khualzin (foreign tourist) erawh kan hip phah ang a, media hmanga vawrh darh tlak, khawvel mipui entir tlak a ni ngei ang. Kan hnam ziarang tam tak tivul zelin Chanchin Ṭha nen inmawiin Chapchar Kut kan hman zel a va pawimawh em!

- Chhungpuia Renthlei