Chapchar Kuta zu ruite kha

Kum 2015 Chap-char Kut Aizawl Lammuala an hman kha zu rui zalenna kut an ti mai a, kei pawhin thlalak ka hmuh khan ka pawm nghal mai a. Kum 2016 Chapchar Kutah zu rui an zalen tawh lohna turin sorkar hian ruahmanna a neih leh neih loh hre lo mah ila nikum anga thil thlen tawh lohna tura ṭawngkam khat tal neih hi ka ba ve tlata ka inhriat avangin thiam lo chungin ka han ziak ve a ni.

MLTP leh MLPC Act tih velah val hi ka buai ve lo. MLTP Act hmanlaiin zu zuar an tam a, MPPC Act hnuaiah zu zuar an tlema zu zawrh tur an ngah thung a, chutiang vel mai mai chu a ni a, sorkar tan chuan chhiah lak hnem theina tur apiang hi a ṭha a ni mai a, tichuan zu chu zawrh a ni ta.

Chapchar Kut kha zu zawrh hlimthla lan chhuahna angin ṭhenkhat chuan an puh ka ring a, ka puh ve thung chu Home Mi-nister leh a hote mual-phona a ni daih asin.

Zu zawrh dawn khan Home Minister leh Excise Minister ni bawk khan zu chu khuahkhirhna hnuaiah an zawrh tur thu a sawi a, Chapchar Kuta ualau taka an ruih leh luih luih chuan ama mualphona tur a ni tih hi a hote khan lo hriatpui se a ṭhat ka ring. Zu zawrh phal a nih hma pawhin a ruka zuarte zawrh leiin an rui suau suau tho a, tunah chuan Minister-in zu rui hrem a tiamna hun kan thleng tawh a hrem se a ṭha ang. Chapchar Kut hi naupangte kalpuina tlakah i siam ang u.

Tlangval rui sa-hawkna, nula zakthei lo zu rui inlarna leh miss nih chakho tei suau suauna kutah kan chhuah mai ang tih ka hlauh avangin western music thluka kan concert ṭhin lam hi chu khak tel lo mai ila. Zu rui zalenna kutah kan Mizo kut hi kan chhuah chuan Home Minister tan chuan mualphona a chang ve thei nia ka hriat avangin Chapchar Kut hma ngei hian ka rawn au chhuak a ni.

Police lamin an hotupa thusawi zurui-te mana hrem an tum-na kha kan Mizo kutah hian a takin rawn lantir se a ṭha ang; chuti lo chu kan kut hi zu rui kutah a chhuak hlauh dah ang e.

Chapchar Kut hi fate hruai ngamna kut, zu ruite an tawm imna leh mi ṭha rual tana kal chakawm kutah kan siam leh a ngai. Central YMA reng reng pawh hi he thilah hian ral bang thei a ni lo; an mawhphurhna a lian ve riauin ka hria. Ruihhlo man theitu an ni bawk a, zu rui pawh rawn vai hma vek se, Chapchar Kut thianglhim tak Lam-mualah hman ni se.

Kan artificial grass hlut em em ṭhin hi zu rui lote tal hian chil chul vek se tihte ka rilruah a awm a, an chil chhiat tho tho avangin a rui satliah chil chhiatah chuan a pamhmai deuh lo maw? ka ti ve duh.

- Hmangaihzuali