Taxi kan enkawl dan hi en nawn a ngai

Mizoram sorkara traffic management coordinatioan committee (TMCC) chuan March 1, 2016 aṭangin taxi chu ṭhuang thuma intlanchhawk a rawt a, he rawtna hi thil dang dang vangin nawrh huaihawt a ni a, tihpuitlin a ni rih ta lo a ni.

Kan taxi neitu leh khalhtute hian taxi intlanchhawk hi an do ngawr ngawr vek lo a, mahse transport department-a public carrier enkawl dan leh a fee a tih danglam bawk vangin kalpui a ni rih ta lo a; heng hi a ruala tih ni lo se chuan taxi intlanchhawk ngawr ngawr hi chu a hlawhtlin a rinawm.

Taxi hi MNF sor-kar lai khan kan khawpui zawh tawk aia tam permit an pe a, anmahni inṭamchhuah khawpin Aizawl khawpuiah hian taxi a tam a, khawpui chep tak karah heti khawpa taxi tam hi a inhmeh lo hle a ni. Congress an han sorkar leh khan taxi permit pekchhuah a awm nual bawk a, hei hian khawpuia lirthei chevel tan harsatna a thlen ta a ni.

Ni e, kan taxi enkawl dan leh pertmit kan pekchhuah dan hi ennawn a ṭul ta khawp mai. Kan taxi-te hi state dang khawpuia an tihdan ang lo takin veng tinah hmun ṭha lai laiah stand kan pe a, kawn ṭha lai laiah stand sei tak tak an nei a, lirthei dang han din zawk duh pawhin dinna a awm meuh ta lo.

An stand lah hi an keipui sa hauh tlat mai a, midang han din ve hlek pawh an phal lo a ni ber. General parking-ah duh duhin an din ve theih tho laiin private lirtheite'n an stand-ah thil lei tura din zawk pawh an sapui hauh hlur si a ni hi.

Tunhnaia public carrier an nawrh ni pawh khan kan driver ho in lulinzia kan hmu vek awm e. Taxi an service lo a, stand-a ding pawh an awm mumal loh lai khan an stand kha lirthei dang park nan an phal lo mai pawh ni loin, lirthei dang an din ve loh nan hruia pawtin an hauh tlat a nih kha. Chuvangin, taxi hian stand ṭha
ṭha an neih hi mipuiin kan thik ta e.

Vengtin Local Council leh kan AMC hi ṭangrual se, tuna veng tina stand an neih chanve aia tlem hi pe ta se, mipui tam zawkin kawngpui sir kan chhawr ve thei tawh ang. Heti em ema taxi kan duhsak hi thil dik a ni ta lo e.

- Lalkhirhvela