MNF Constitution palzut a ni em?

Kum 1998 aṭanga kum 2008 kum tawp thlenga Mizorama sorkarna chelhtu MNF hian an hun chhung khan hna pawh an thawk nasa hle tih chu mit ngeia hmutute kan ni. Kum 2008 inthlan dawn khan a hma zawng aia ‘chance’ neih ṭhat an inring a. “Term thumnaah Congress party hi kan hneh chuan kan ching zal der ang a, hlauhawm tham an ding chhuak tawh lovang,” tih chu an hotute khan an sawi tlawr hlup ṭhin. Kan han inthlang ta cheng a, sawrkar siam leh a, nasa taka Congress party hneh chu sawi loh; Opposition ni khawp MLA pawh an nei zo ta lova, Group invuah tawk chauh MLA an neih kha kan la hre ṭheuh awm e.

Kha khan chhan leh vang hrang hrang a neih zingah an sawrkar term tawp lam phei kha chuan sorkar leh party inkar kha a zau hle tawh nite pawhin a lang. An constitution pawha awm hlei lo, Party awptu Hnam Rûnah khan nihna sang tak, ‘Principal Secretary’ post te an vuah thar lurh mai a. Mahse, sum leh hna lamah erawh thuneihna an pe chuang lem lo ni ber khan a lang.

Tunah hian an constitution-te pawh an siam ṭha ta rum rum a, party dangin an neih ve loh ‘Core Committee’ thuneihna sang tak neite pawh an dah thar a. An thuneihna a inziah dan takah phei chuan ‘Sawrkar leh mipui inkara thawhhona ṭha a awm theihna turin, a ṭul apianga hma la tur an ni ang...’ tih a ni a. He an ‘Dan’ hi chang 44-naah a inziak.

An President Pu Zoramthanga sawi dan phei chuan, “Kan sawrkar leh phawt chuan Cabinet-in thutlukna a siam reng rengah National Core Committee remtihna leh hriatpuina tel lo chuan, eng thu mah sorkarin a titlu lovang a, party (Hnam Rûn) in a hre vek zel ang...” tih hialin a mite hriat turin a sawi a, an phur tlangin ngaihnawm pawh an ti hle hlawm a nih kha.

Aizawl Municipal Corporation (AMC) kan han inthlang a, ruling party Congress pawh anmahnia ding ngam lovin thawhpui an nei a. Opposition party lian ber MNF erawh an mal din thung. Chuti chung pawh chuan MNF chuan hneh takin AMC a Congress sorkar chu paih thlain AMC sorkarna chu a siam ta a. Heta ṭanga an party boruak lo lang leh det det niawm tak chu, an core committee din, an pu berin a sawi pawimawh em em, Hnam Rûn aiawh tura an din khan ngaih pawimawh teh chiam a hlawh leh lovin, an worker tam tak chuan an hre ṭan a. An pu thusawi ring ngam ta lo an kat ṭan leh nuk ta mai ni hian a hriat a.

An party mite sawi dan chuan, an thusawi ang tak taka thil tih tum chu nise; Core Committee an din hi an hman ṭangkai an ring a ni. Heti a nih chuan lo sorkar leh ta pawh ni se, an pu sawi ang khian Core Committee hi an ring zo ang em tih chu an zawhna lian tak a ni tlat. Tunah tak chuan an party thu leh hla ngaihtuah tur pawhin Core Committee hi an party a thuneihna sang tak nei ve tho Political Affairs Committee (PAC) te nen an rel tlang zel ni awm tak a ni.

Khawi political party-ah pawh an pu ber ten an sawi anga awm leh ta lo ṭhin hi mipui leh party-in an ring zo lo tlangpui a. Hetiang a nih chuan MNF pawh lo sawrkar leh ta se, an sawrkar hmasak ang tho khan sorkar leh party chu a inhlat hle tura ngaihna a awm tlat. MNF party chik taka lo thlithlai tute chuan a hmingin Dan bute chu an nei ve mai mai a lawm tihna rilru a lian ṭan dawn nite pawhin a ngaih theih.

He tih rual hian India rama awm kan ni a. UPA a ni emaw, NDA pawh nise anmahni siamtu party-in policy an zam sa a kal an ni ber a. Sawrkar hi party avanga piang a nih avangin party an dah lal hle
ṭhin tih kan hria. Party policy duan sa an duh avanga sawrkar siam a nih avangin, Minister te pawhin policy zam sa chu khawng takin an kal pui a. Kan hriat
ṭheuh angin Issue lian a awm reng rengin Minister-te an inrawlh ngai lova, an party spokesman/ spokes person te thu leh hla kan ngaichang ber ṭhin a ni. Nihna ropui tak ringawt inpek a, mawhphurhna inpek leh si loh hi a khingbai tlat a ni.

- Ramnghaka, Tuikual Aizawl