CCE hian zirna a tichhia

Sorkar laipuiin zirlaite hmakhaw ngaiin Primary leh Middle school zirlaite tan fail awm loa kalphung thar a duan a, Comprehensive Continuous Edu-cation (CCE) a rawn duang chhuak a. CCE ruahmanna a rawn chhawp chhuah tir khan thil ṭha tak tur niin a lang a, nu leh pate pawh kan phur hman viau a ni. Mahse CCE kan kalpui tak hnu hian nghawng ṭha tak nei tura ngaih a nih laiin, zirlaite tan zirna a chhiat phah hle tih hmuhchhuah a ni.

CCE kalpui a nih tirh aṭang khan zirtirtute an inthlah-dah lo thei lo a, chutiang bawkin zirlaite an inthlahdah em em bawk a, zirlai nu leh pate pawh kan inthlahdah viau tih hi a chiang reng mai. Hetiang kan inthlahdah chhan nia lang chu zirlaiten an zirlai tun hma anga ngawrh taka an zir lo a nih pawhin CCE avang hian an fail dawn lo tih kan rilruah kan hre chiang a. Chutianga thil chiang sa kan hriat avang chuan nu leh pate kan fate zirlai enpui kawngah kan thatchhia a, naupangho pawh ngawrh taka zir tura nawr an nih loh vangin an inthlah a, hei hi kan chhiat pui tlang ta niin a lang.

Kumina zirlai result chhuakah CCE khan nghawng ṭha lo tak a nei a, zirlai tam tak chu an fail a; a pawi hle. Zirlai exam mekte lakah pawh CCE hian nghawng
ṭha lo tak a nei dawn niin a lang a, zirlai ṭha taka pass tur pawh hlawhchham tam tak an awm phah ngei a rinawm.

CCE hian kaih-hnawih tam tak a nei a, sikul tam takah zirlai tan thil hautak deuh deuh an tihtir a, chung avang chuan an zirlai an tih ṭhat phah chuang lo a, nu leh pa tan sum a hautak em em mai bawk si a; phurrit tam tak a awm phah zawk a ni.

Naupang lam lahin min ti pass tho dawn a, tiin zirna lamah ṭan an la nep em em a, zirtirtu lam lahin ṭhahnemngaihna aiin inthlahdahna lam an nger bawk si. Nu leh pa lam lahin CCE a nih tawh chuan in fail thei lo, tiin inthlahdahna rilru a awm tawh a, kan zavai tan a pawi ta em em a ni.

Tun hnaiah Primary leh Middle school exam zo tawhin result an tichhuak a, Aizawla sikul ṭha ber zinga mi aṭang pawhin zirlai fail an tam ta reng a, a pawi tak meuh meuh a ni.

- Lalhminga