Kan Aizawl khawpui hi

Kan Aizawl khaw-pui leh a chhunga chengten hma kan sawn ve zel a. College kal tura kum 2010 June thlaa ka nu nen kan rawn chhukthlak laia ka hmuh tirha pui ka tihzia te kha aw; tunah hian a pui leh tawh zawk a. Mahse Aizawl khawpui hian India ram state dangte el pha tur chuan hmabak tam tak a la nei a ni.

Mizote chuan Aizawl khawpui chauh hi khawpui (city) tia han sawi tur kan neih chhun a ni a, lirthei pawh a tam. Mi hausa pawh an tam a, a chhunga chengte pawh an changkangin an hmel a ṭha. Mahse, kan Aizawl khawpui hi tun aia nuam zawk leh changkang deuh zawka siam tura hma kan lak chu a pawimawh khawp bawk mai. Kan state economy-in a phak loh thil tam tak erawh a la awm ang.

Faina kawngah erawh a chhunga chengte kan changkan a, kan nun dan leh incheina a san dan ngaihtuahin kan khawpui hi a fai tawk lo a, a thianghlim tawk lo tlat. Aizawl khawpui chhung kawng pui bik Zemabawk aṭanga Ngaizel thleng na na na hi chu fai taka enkawl a pawimawh hle mai.

Durtlang kawng chhote pawh hi ngaih-thah chi a ni lo. Sweeper ten zing tin kan Aizawl khaw chhung kawngpui dung hi an phiat fai ṭhin a, a fai chhung a rei chu sawi loh, sweeper te hian duh aiin an phiat fai tawk ṭhin lo niin a lang.

Durtlang kawng chho phei hi chu an phiat ngai lo niin alang. Sawrkar hian zing karah chauh ni lovin tlai lamah pawh kan kan khawpui fai theihna tura theihtawp chhuahtu sweeper te hi phiah tir thei se a ṭha hle ang.

Kan bazar pui leh a chhehvel pawh hi tun aia thianghlim deuh zawka enkawl dan awm thei se a duh-awm hle. Mipuite pawn bawlhhlawh hi a bawmah chauh paihna chang kan hriat a ṭha ve bawk. A tifaitu kan ni thei lo a nih pawn a tibaltu ni lo hram ang u.

Kawngpui ṭha neih kawngah ṭanlak a ngai bawk. Kan khaw kar kawngte mam takin kan siam thei lo a nih pawhin Aizawl khawpui chhunga motor kawngte hi chu ṭha zawk leh mam zawkin kan ram hruai-tute hian siam thei se a duhawm hle mai.

Durtlang kawng chhote pawh hi kan ram hruaitute hian han siam ṭha thuai thuai thei se, Durtlang khaw chhung kawng te pawh hi siamṭhat vat ni thei se a duhawm hle mai.

Khawpui kawng bik hi chu a chhe lai, a khawk leh khuar lai a awm hlek pawha thawm ṭha nghal zel thei turin PWD lama thawktute inring reng-in awm thei bawk se.

- Nawlchunga Chinjah, Siaha