Khawtlang sualna engtia ven tur nge?
Khawtlang sualna laka inven dan tur titi anga sawihona ram pum huapa huaihawt a nih takah chuan khawtlang ṭhatna veitute tan chuan tel ve mai a chakawm a. Ram hnuk khawih khawp thuneihna kal sual pui te pawh an awm.
Sualna leh sual dan chi hrang hrang a awm a, tualthah duhna khawp sualna, rukruk ching (mipui chanai lak ching), Inthlana dan lo anga vote ruk ching, mipui bum ching, thubuai remnaah thamna it vanga thiam lo zawk thiam chantir, mahni hamṭhatna um vanga chibing politics kaitho zawnga hmalak, luia nungchate suat rêm ching, vantlang kawngpui dip tlat khawpa duhawm, ram ngaw humhalh a ṭul laia ram hal chereu ching, zu leh ruihhlo zawrh ruk ching, mipui tiralṭi ṭhin, Kohhran leh sorkarin a khap thil palzut hreh lo khawpa sual te pawh an awm a ni.
Khawtlang sualna han tih hian zu ruih leh nawhchizawrh lam a ni mai lo a, thil dang tam tak a huam tel a ni. Lang thei sual piah lamah hian lang lo lamah sualna tam tak a awm a, mipui chanai chheprelh ching te leh Mizo mipuite rilru hruai sual ṭhak khawpa politics dik lo kalpuitute pawh hi ram hmelma lian ber berte an ni ve bawk.
Sualna ven dan lam han sawi leh ila. Sorkarin dan bawh-chhetu hremna Dan a siam a, chu dan hmanga misual hremna lekkawhtu tur, dan hremite hlawh ṭha tak neiin a khawi reng bawk a. Chuti chung chuan kan ramah sualna a zalen viau tho niin a lang.
Hei hi a chhan kan hmuh chhuah vat a ṭul a, kan tihtawp ngam a ngai bawk.
A chhan lian tak pakhat nia lang chu misualte hremna hi a na tawk lo hi a ni. Dan leh thupek kan kenkawh ṭhat tawk loh avangin thil pawi tam tak a thleng mek a, a thleng fo tawh bawk. Hetiang hi kan dinhmun a nih avangin misualte pawh an tawmim lo a, hmun ṭhenkhatah phei chuan zalen takin an che thei a ni. Misual hremna dan hi sual sim nathama kan siam a ngai ta a ni.
Hetianga misual hremna dan khawih leh hlauhawm zawk kan siam a, kan lekkawh hnu pawha sual lui tlatte erawh chu mi te ber aṭanga a lian ber thlengin ngaihdamna tel loa hrem ni se. Hetiang taka kan kal phawt chuan he kan Zoram hi a dam leh ang a, kan tu leh fate tan chenna tlak ram nuamah kan siam leh thei ngei ang.
- Pangṭhuama, Chanmari, Aizawl