Politics inlumlet a awm lo

Tun hnaia Mizoram politics che vel thlir hian, thil thar kan hmu dawn lo tih a lang a, keini ang mi beisei nei lo hma deuh chu kan beidawng rum rum chu a ni ta a, tun thlenga politics kal dana beiseina la nei hi chu ka ngaisang letling dawn che u nge ka ngainep dawn che u? tih hi ka la man thiam chiah lo a ni.

Mizoramah Cong-ress-in a term hnihna atan sorkarna an siam a, thil kal dan en hian an term thum mai dawnin a lang. Aizawl Municipal Corporation inthlanah MNF-in hnehna changin lang mahse an vote belh-khawmah khan Cong-ress leh MNF kha a inzat deuh chiah chiah a, AMC inthlan hmasa aiin Congress ho vote hi a ṭha zawk a la niawm zui a, anni hi kum 2018-a an sorkar leh chuan he ram hi a ngaihtuahawm dawn si a, tunah hi chuan Congress phet thlu thei tur kei chuan ka la hmu lo.

Ka sawi tum sub-ject-ah lut ta ila, ka beidawn chhan chu Congress sorkar chhan hi NLUP a nih vang a ni. Mipui hi kan â kumkhua tawh lova, inthlan dawna NLUP tawktara hmanga cheng nuai 1 min tiam-tute kha kan thlang tling a ni mai. Congress hi MNF aia a ṭhatna pawh ka hre lova, mahse MNF chu kum 2008 inthlanah ke vawr suauin phehthlukin an awm a, kum 2013-ah chiang zawka bawhbeh nawn an ni. MNF hian Congresss an hneh lovah ka ngai ve lova, NLUP an hneh lo a ni. Congress hi chu a hmaa MNF-in an lo hneh hnu tho kha an ni si.

Congress-in nuai 1 an intiam a, pawisa an sem loh chuan kum 2013 inthlanah an tla dawn si a, sorkar-a sum awm thei ang ang sawk khawmin NLUP an kalpui ta. NLUP hi a thawk na si a, mipui kutah pawisa a luh si avangin mipui thinlung hian Congress lam an hawi ta a, tunah pawh NLUP dawng chin chuan midang vote chu harsa an ti dawn.

MNF an harh ta a, harh dan chhe chiin an harh a, thil thar tih tur hre si lovin pawisa sem ve mai an tum a, NLUP aia tam sem tumin cheng nuai 3 sem an tum thu an president-in a puang ta a. Congress aia an ṭhat vang ni lovin, an sem tam theih zawk avangin mipuiin an vote lo ang tih a sawi theih loh. A tawpa a tuartu tur chu Mizoram sorkar sum bawm hi a ni dawn tho a, politics-a hamṭhatna duh vanga pawisa sem bawk an rawn tuipui hi MNF-in NLUP an ngaihsanna tilangtu leh tlin tum vanga sum sem an pawm zia tilangtu a ni leh ta a ni.

Tun hnaiah politics-ah eng thil thar mah a awm lo, "Tunge mi-puiah sum zuar thiam zawk?" tih hi kan Zoram politics a ni. ZNP leh MPC a ral lam an ni a, party dang hi sawi tham a awm si lova, Mizoramah chuan Congress leh MNF bawk kan thlan lal a ngai dawn a, kan duh loh ve ve kan tih hi kan buk leh dawn a nih hmel a, kei chu ka bei a dawng rum rum
ṭhin asin.

- Vohbika Pa