Lo Hal

Lo neih hi hman atang tawha tun thlenga Mozoten kan la chin chunzawm zel te zinga mi a ni. Lo neitu chuan a thlawhhma tur vatin a hal leh thin a, tichuan buh leh thlai a ching ta thin a ni. Lo hal hun hi hman leh tunah chuan a danglam deuh tawhin a lang.

Khawtin lo hal hun a inang lo nuka, an mahni remchan dan angin an hal mai thin. Kum alo kal zela tunah chuan sorkar pawhin lo hal hun tur a ruat ta. Hei hian thahna leh that lohna sawi tur tam tak a nei thei ang.

A thatna

Sorkarin lo hal hun tur a ruat hian nasa takin ram kang a veng. A tlangpui thuiin March ni 15 hmain sorkar chuan lo neitu leh huan neitute chu hal turin a hriattir thin a, mipuite tan pawh a him zawk niin a lang. Lo hal hun sorkarin a ruat avang hian kangmei chhuak palhah mipui leh sorkar tan tanrual a awlsam a, kangmei ven a tiawlsam zawk bawk.

A tlangpuiin march ni 15 hi chuan khua ala ro lutuk lova, hei hian ramngaw kang chhe tur tam tak a hum kan ti thei ang. Sorkarin veng leh khua kangmei tichhuak tlemte hnenah lawmman a pek thin hian mipuite rilruah hna a thawk a, kangmei tuchhuak tu nih duhlohna mipuite rilruah a tuh mek a ni.

A ṭhat lohna

Lo hal hun sorkarin a ruat hian a bikin lo neitute tan harsatna a thlen kan ti thei ang. Vahchap chu a ro that emaw a hun takah hal a nih loh chuan Lo a kang tha lova, hlothlawh leh buh leh thlai thar thlengin a nghawng thei. Lo kang ṭha loah chuan hlo a har
ṭhin a, chu chuan tha leh zung leh hun tam tak tul loah lo neituten an khawhral thin.

Lo chu hneh taka thlawh a nih lo chuan buh leh thlai chin chuan nasa takin a tuar thei a, hnimin puitling thei loin a dip ral thei bawk. Tuna kan sorkarin lo hal hun a ruat hi chu hmun thenkhatah chuan a hma deuh niin a lang.

Lo hal hun atan eng ni pawh ruat nise a pawimawh ber zawk chu mipuite kan ni. Lo hal hma-a meikawng tha taka sial hian nasa takin kang mei chhuak tur a veng thei tih hriain, Lo hal hman ngeiin meikawng sial ngei ngei tur a ni. Mipuite hnenah kangmeiin chhiatna a thlen nasat zia leh ramngaw a chereu chak zia inhrilnawn fo a ngai a, kan nunah nghawng a neih pawizia hi sawi tam lua a awm lo. Lo hal a hun chho leh ta e, fimkhur turin i inhrilh nawn fo ang u khai.

- Matea Pa