TU NGE DAWT SAWI ZAWK LE?

Tunlai khawvel changkang zelah hian mi tinte kan fimkhur a ṭul lehzual ta hle mai. Electronic media kan hman tak aṭang phei hi chuan thu phuahchawp leh belhchian dawl lo sawi mai mai hi a hlauhawm ta e. Hmanah leh tuna kan thusawite hi record-a vawn ṭhat a ni ta zel si a, phuahchawp leh rinthu vel mai mai sawi chin chu mualphona a ni ta zel mai. Ram hruaitute phei chu fimkhur a ngai lehzual ta a nih hi.

Tun hnaia social media-a langsar leh sawi hlawh tak, CM Pu Zoramthanga thusawi leh Minister Pu Lalruatkima, MNF Adviser ni bawk thusawi inkalh tlat, a video thlenga tarlan hian sawi a hlawh hle mai. Pu Zoramthanga chuan SEDP chu cheng nuai thum aia tlem lovin, NLUP lo dawng tawh zawng zawng hnenah pawh an sem vek tur thu uar takin a sawi a, chu chu a video pawh hmuh tur a awm a ni. Pu Lalruatkima ve thung chuan North East live-in an interview khan SEDP atan cheng nuai thum sem an tiam loh thu ti hian sap ṭawngin a lo sawi ve thung a, " We are not promising the three lakhs to distribution to the beneficiaries of SEDP," (a tawi zawngin). He video hi tunlai hian a darh nasa mai si a, CM leh a Cabinet Minister thu inkalh tlat hi thil sawi fel ṭul tak niin a lang. A tu emaw zawk hi chuan thu dik lo (dawt) an sawi tih hi a chiang si a, pakhatin Mizo ṭawngin fiah takin a sawi a, pakhat zawkin sapṭawngin mam (fluent) vak lovin a sawi nain Sedp-ah nuai thum sem an tiam loh thu a sawi ngei tih erawh a hriat theih a ni. SEDP hi a pian a fuh chiah lo nge ni, hmán deuh tawhah khan Minister Dr R Lalthangliana pawh khan, SEDP hi a sema sem tur lam a nih loh thu kha a lo sawi ve bawk a. Mahse hei, CM sawi ang aia tlem daihin an sem ta ngei chu a ni a, SEDP chungchanga Minister pathumte thu inkalh aṭang ngawt pawh hian sawi fiah ngai zawng a awm ngei a nih hi le.

Ruling party President leh CM ni bawk thusawi kalh zawnga Minister pakhatin SEDP chung chang hnam dang journalist hnena a lo sawi mai hi a darh zau si a, sawi fiah vat a ṭul hle a ni. Kan CM-in mipui hnena nuai thum sem a lo tiam tawh dawt sawia puh tumnate pawh a ang thei dawn a lawm le. Assam Rifles ho an Kel sa kanna bel nen an insawn chhuak, Isarel fate sal aṭanga bawngbawr taka an chhuak nguah nguah tehkhin thawm, a tak chang leh si lote thleng khan min hriat chhuahtir thar leh ta e! An thusawi aṭang hian thu dik lo sawi zawk chu an awm ngei tih a chiang a, hei zet hi chu sawi mam chi niin a lang ta lo ve.

SEDP chu CM sawi ang khan an sem ngei a, a tiam zat erawh chu an sem lo thung a, a sema sem tur lam a ni lo, titu khan thu dik lo a sawi a ni thei em? Pu Ruatkima pawh hian SEDP ah cheng nuai thum sem kan tiam lo, tia media hmaa a lo sawi ngawt hi hnam dang ṭawngte a nih vang hian a sawi tum tak a sawi fu chiah lo zawk em ni le? Kan CM meuhin NLUP dawng tawh zawng zawng pawhin SEDP nuai thum aia tlem lo an dawn tur thu chiang taka a sawi lai a, cheng nuai thum sem kan tiam lo tih Minister Pu Ruatkima'n a lo sawi ve ngawt hi MLA election hma ngeia sawi fiah a va ṭul ve le, mi dik leh dik lo kan hriat theih nan.

Lem ang min derna mai a nih vaih chuan, mipuiin lem ang kan der ve mai palh ang e. Minister meuh dawt sawi an awm a nih chuan thlan nawn kan ba lo va, kan hnawl hmak tur a ni ang.

- Mami pa, Aizawl.