MNF HI SORKAR-NA PEK LEH CHI A NI EM?

Khuhhawnna: "An party President hi thlak ta se la, duh duh sawi ve lo tur leh duh duh sawi lo va, party manifesto tih puitlin tuma ram leh hnam dinchhuahna tak tak tur ngaihtuah mi party President leh, chutiang mi chief ministerial candidate chu nei ta se la, a dan a dang deuh mahna. Mahse, chutiang tur chuan tun hun atân chuan khua a tlai zo ta si."

Kan hriat ṭheuh angin kan hma lawk November ni 7, 2023-ah hian Mizoram state chuan MLA general election kan hmachhawn leh dáwn a, political party hrang hrangte inhruipawhna pawh a na sâwt ta viau mai, duhthawh luatah thu dik lo hmanga mahni khingpuite beihna rawngkai pawh a tam ta hle a nih hi. Hetih rual hian Mizoram mipuite chuan sorkarna siam tura an duh (Vote an pêkna lam tur) chu an rilruin an ngaihtuah fel thawkhat tawhah a ngaih theih a, inthlan boruak han thlîr hian tuna sorkar kan hrawn mêk MNF party hi mipuite hian sorkar chhunzawmtir zêl an tum ta lo niin a lang.

"Eng vangin maw?" kan tih chuan, kum 2018-a sorkarna an rawn chan leh khan an sorkar aṭanga kum khat hnu velah Chief Minister, Speaker, Minister leh MLA te hlawh leh hamṭhatna dang dang chu âwihawm loh khawpin an tisâng vak mai a. Congress sorkar laia Chief minister leh minister-te'n an term hnihna atân motor thar man to bawk si an lei, anmahni ngei pawhin an sawisêl ṭhin pawh chu anmahni (MNF sorkar fawng vuantute) ngei chuan an ti ve leh ta mai a. MLA zawng zawng (Minister tiamin) motor thar hlak, chêng nuaih sawm man a thlawnin an inpe vek a. Mipui ban phâka ruai chawi hniam tumtute chuan, mipui tân ruai ṭheh lovin fatute hlui an tihnianghnar ta hle a nih kha.

SEDP hna thawk turin, phuahchawp takin board sawm leh pali (14) an din a, chutiang board hrang hranga vice chairman-te chu minister of state tlukpuiah MNF sorkar chuan a puang chawp a. Congress sorkar hun laia parliamentary secretary tlukpuia enkawl an ni bawk. Heng mite tân hian thla tin hlawh, office, motor leh thawktu eng emaw zât nên thuam an ni. Mipuite chan ve tur, 2018 MLA inthlan dáwna an campaign au hla SEDP lam reng reng an la hawi meuh lo va, mipuiin ruai an kîl hmain fatu hlui chu a bukin, a hmui rum rum tawh a nih kha.

Mizoram mipuite hnêna an inzawrhna lian berte zinga pakhat, chhungkaw tin hnenah cheng nuaih thum chu, vâna rah ang mai ni lo, vân âia sângah an rahtir a, chauhthubarawhah an term tâwp dawn lamah a thawhkhatna chu chhungkaw singruk hnenah cheng 25000ṭ- an sem thei hram chauh va, saṭahchhuak inpêk ang chauh a ni. Thil dang chu sawi loh, hei mai pawh hi 2023 MLA inthlan huna an tlakna chhan tur pakhat chu a ni. Dâwt thu hmangin ram mipui min bum miau si a.

Tin, Hnam party inti siin vai pakhat 'Kamrul Chhangte' kan tih tàk mai hnênah hna an pe tam êm êm bawk a, BJP sorkar an thlâwp bawk. Chu mai a la ni lo, Hmarchhak States-a BJP thlâwptu pawl intêlkhawm NEDA an tihah hian an tel bawk.

Kan sorkar hnathawkte hlawh lah chu a hun dik takah an pe hleithei lo va, chhungkaw tam tak khawsak a buai phah a, manganga an awm laiin kan Chief minister ber chuan hnem ahnêkin, "Ni khata hlawh lak leh ni 15-a lak a inang reng," a la tih khum deuh deuh lehnghal a. Kan sorkar hnathawkte hian, kan chief minister hi Pa angin an en theilova, an thlamuanpui zo ta lo a ni.

He sorkar hnuaiah hian, restricted tender a tam êm êm bawk a, rawng an bawlsak tur leh hnathawh kawr haktirtu ram mipuite tân sum (pawisa) a váng an tih êm êm laiin, a tamna lamah chuan pawisa chu a tam leh hle si.

He sorkar hnuaiah hian Kamrula'n cheng vaibelchhe tam tak man hna a thawh mup mup laiin, OMB hmangin sorkar chuan vawi tam tak pawisa a pûk leh lawi si. Mipui tâna health care bill-te lah chu ṭah loh mittui tlâk ang maia mipui tilungngaitu a ni a, mi harsate tân pawh damloh hi a cho awm loh tehlul nên, mi retheite tân a cho awm loh lehzual a ni.

Kum 2023-a MLA inthlan kan hmachhawn turah hian, sorkarna chelh mektu MNF chuan an manifesto âi chuan, party pakhat beih nân hun an hmang a, an headquarters G.S pakhat lah chuan, party pakhat MLA fund hman dan dâwt thu hmanga a beihna lamah mipuiin thudik an hriat zau phah ta zâwk a, a vawtuin êk a cheh mai ni lovin zun a cheh tel a, a in leh lo din dan hial sawi fiah a ngaih phah ta hial zâwk a ni.

MNF President leh Chief minister ni bawk chuan MLA inthlan hunah hian pawisa a hmachhuan hle a, pawisa hmanga mipui vote leisaka sorkarna siam leh ngei tum ni âwm takin SASCI pawisate chu a chhuang êm êm a. Party dang chu an headquarters hian an MLA candidate-te cheng nuaih 4ṭ5 pêk tur an neih a rin loh thu leh, pûk chawpa an campaign a rin thu a sawi bawk, mipui tham lohnaah a ngaih theih hial âwm asin. Nimahsela, mipui hi an harh tawh, an vote hi pawisa nên thleng an tum tawh lo, sorkar thar, mipui sorkar dik tak hi siam an duhin an tum a ni.

Kumin 2023 MLA inthlan kan hmachhawn turah hian ram mipuite hian kum nga chhunga MNF sorkarin min enkawl dan hi chîk taka an en hian, sorkarna pek chhunzawm tlakah an ngai tawh lo, tunhma anga thu fahrah tak tak leh zêldin thu bawl nena inhnehtir hi an tum lo va, sorkar chet vêl dan hi hnai takah an bih reng a, tuna kan ram kal danah hian lungawi har an ti a, sorkar thar siam ngei an tum ta zâwk a ni.

- MC. Lalthianghlima