Election Campaign Auhla
November 7 hian Mizoram chuan kum 5 chhunga roreltu a thlang dawn a, a vawi khatna atan party lian pathum inbeihna kan hmu dawn a, Mizorama la thleng ngai lo sorkar inring party thar a piang a, Election auhla pawh a inang lo.
MNF: Tunah chuan mau an sawi ri tawh lo. Mau hmanga min intodelhtir tum tute kha an ngawi no zo ta. Tunah chuan Rs Nuai 3 pawh an sawi tawh lo. Pu Zoramthanga Rs Nuai 3 tiamsa kha a naute zinga mi Pu Lalruatkima chuan 'Kan tiam lo reng reng' tiin English meuhin a lo not promising tawh a, Nuai 3 leh Mau an sawi tawh lo. Kawng chhawng pawh an sawi tawh lo. Traffic jam awm lohna pawh an sawi tawh lo. MNF Election auhla hi tun thleng hian kan la hre lo. January thla kha chuan Pu Zoramthanga khan sum a hmachhuan a, SASCI leh MLA Fund hmanga tlin a tum kha Hnam Runah a sawi a, tuna an auhla kan hre ta lo. SEDP sem chhunzawm an sawi a, kum 5 chhunga cheng 25000 sem thei hram hi kum 5 dang atan mipuiin an ring ngam dawn em ni? Assam Rifles sawn chhuak leh thei bawk si lo, nuai 3 sem bawk si lo, kawng chhawng siam thei si lo, Covid chhuanlama siam chunga 'Hripui lêng chunga hmasawnna' tih poster tar bawk si, Kamrula hausa bawk si, an auhla kan hre tawh lo.
Congress: Congress auhla hmasa ber chu Ṭhat loh Theih Lohna Bawm a ni a, a chhungah hian an Minister hlui kum 2018-a kan paih kha an la awmkhawm kuk a, he Bawm hi an sawi ri tawh lo. Chumi hnu chuan NLUP duh lo inti; Pu Sawta ho chuan vote zawn dan an ngaihtuah a, Ṭang Puihna an rawn ti a, Ṭang leh Ṭang lo hi Congress zawng an Ṭang, Congress lo zawng an Ṭang lo dawn a nih a rinawm a, Ṭang an teh dan hriat a chakawm. Tichuan BJP an zawm loh avangin tlin an tum bawk a, BJP zawmpui MNF an awmsa reng chu sawi lovin; BJP zawm lo tura rorel tawh ZPM chu a rem ang angin an puh. Pu Ronald Sapa phei chuan, "Inthlan an puan hma chhan chu BJP-in ZPM a duhsak vang," ti zawngin thu a sawi a, a MP laia hna a thawk chak lo kha a lo mak vak lo a ni. Mi party BJP nena inzawma puh hmanga Congress sorkar avanga Mizorama Kristianna humhim tur anga inzirtir chungin, Hindu pa Rahul Gandhi an chah chhuak a, BJP zawm loh vanga sorkar tur chu ni se Congress, ZPM, Zoramthar leh Mimo pawl hian chance an nei vek a ni.
ZPM: An phur tarh tarh khawp a, pawl chhuak angin an awmkhawm hi anmahni leh anmahni hi an inkawm tlei tawk. Kalphung Thar Mipui Sorkar an zuar a, eng tak nge kalphung thar tih zawt ila sawhthing lei bak sawi pel hleithei lo party worker an ngah. An hotute thusawi lam hi chu a ngaihnawm deuh ber.
A duh duh tling se, dawt sawi ṭhin chu lo paih zel tawh rawh u.
- K Lalremruata