MIZORAMIN FINANCE MINISTER ṬHA A MAMAWH TAKZET

Mizoram sorkar sum enkawl hna hi tih namai a ni lo a, tawngpawng basa ngam chi pawh a ni lo a, duh duh lam hawi zawng a Bawngkawn kawtthler kawh kual chiam chiam ang mai a rin thu leh phuahchawp thu fahrah te te nen a arkhawthim dai bawrh bawrhna chi pawh a ni hek lo, mithiam leh a ngaihna hriate thawh tur a ni.

India ram state hrang hrangah hian state tam zawkah Chief Minister-te hi Finance Minister an ni ngai lo. A nihna takah phei chuan Chief Minister hi Finance Minister ni tura ngaih an ni vak lo zawk a, a chhan chu state sum enkawl hna hi hna hautak em em a ni a, a ti mi deuhte thawh chi a ni bawk a. Chuvangin, Chief Minister tam zawk hian Finance enkawl hi an tihturah pawh an dah vak lo.

Kan Chief Minister hlui Pu Hawla kha a boruak hap level kha a sang ve riau a, mipui nuihzabur (joker/comedian) a insiam chi phei chu a ni miah lo. A theihna chin a hria a, chuvangin, a Cabinet Minister zingah state finance enkawl turin mi rintlak tu emaw a dah deuh zel. Chief Minister dawhkan paltlang lo in file pawimawh a kal ngai chuang lo tih chu mitin hriat a ni a, tin, Chief Minister chuan hna dang leh buaina tur dang dang an ngah em em bawk a, tlin lo chung chunga state finance enkawl tum luih hram kha thil tul leh thil tha ber a ni lo tih a hre chiang viau a ni mai.

Mihring hian thiam zawng kan nei a, tlin chinte hi kan nei bawk a. Kan chim chin thuah chuan keimahni hi kan chiang ber mai a, kan thiltih dan atangin midangte pawhin kan chim chin min hriatchian pui viau chang a awm bawk a. Mahni tlin loh napui chu awmze nei a han chai vak ngaihna hi a awm lo viau reng a ni. State sum enkawl hi hna tak tak a tling a, mi bikte thawh tur a ni. Kan sorkar hrawn mek a kan sum enkawltu hi amah ngeiin a insawi danin a unaute sum tam buru lutuk, a hria apiangte mak ti a an chek tlawk tlawkna khawp a tam sum kawlsaktu kha a ni mauh mai a. Kan sorkar hrawn mek hian sum enkawltu a nei tha lo em em mai a, a nghawng pawh a na rap rap ta hle mai a nih hi mawle.

A beidawnthlak em mai a, kan duham ve lawk teh ang. Thiam ber leh hre ber thawk a thaw ham ham thei zel, mi azawnga hre ber niawm taka expert zawkte pawh lecture khum nghek zel mai chi, ngaihthlak aia sawi nuam ti chi, hriat belh tur leh thiam belh tur thil pawimawh tak tak a tam nasat tehlul nen, rinthu leh phuahchawp thu lawilo tak tak phuh chhuak zer zer reng ringawt mai chi tan chuan state finance hna harsa leh pawimawh tawpkhawk enkawl chu a harsa ve ngaih ngaih khawp ang le!

“Sorkar hnathawkin thla tira hlawh an lak leh thla tawpa hlawh an lak hi an tan engnge a danglamna?” tih thu hi ‘thusawi ropui lo’ huanga khung chi a ni a, kum tam liam hnuah pawh miin fiamthu thawh nana an la hman zui tur tawngkam a ni. Thla hlawh lak hunbi in mimal, chhungkua, khawtlang, kohhran leh ram a nghawng nasat turu zia pawh hrethiam lo Finance Minister nei state kan nih avangin thla thar hlawh sem dawn apianga puk tur zawng reng reng a vir buai thin state te hi lo ni palh ta hlauh pawh ni ila, kan inhmeh tawk angreng viau tho awm e.

Inthlan thlaah meuh pawh sorkar hnathawkte hian a hun takah hlawh an la thei ta chuang lo a nih pawhin mak ti vak lo mai ang u, kan Finance Minister hian a hna hi a tlin ngang lo a ni. Sorkar tharah chuan Mizo mipuite hian Finance Minister tha, rintlak, a ngaihna hria, sawi teuh tu aia ngaihthlak taima, titi a distinction a pass ringawt lo deuh kan neih kan beisei a. State sum enkawltu atan chutiang mi tak tak min chhawpchhuah sak thei party chu kei leh ka chhungte chuan kan vote dawn a ni.

- BT Vanlalringa Khenglawt