OCTOBER NI SAWM PAKHAT 2023 LEH KUM 80 BIRTHDAY LAWM
H. Lalthanpuia 71 Director Agri Retd. Dt 5.10.2023-a boral chu a thawhpui ṭhin Mizoram Agri, Horti, Irri Officer pension Association ten Dt. 11.10.23 khan a in; Laipuitlangah kan ral a. Amah hi pa nelawm, rualkawm thiam tak a ni a. Kohhran Upa niin Ramthar rawngbawlna lam ngaipawimawh tak mi a ni. Sawrkar hna a chawlhsan hnu hian Thlarau bo zawng (TBZ) ah Field Director-in Madhya Pradesh-ah a thawk zui a, Covid 19 hripui vang khan a lo chhuak a, Cancer natnain a tlakbuak zui tak avangin a rawngbawlna lam chu a chawlhsan ta a ni. Ram hmasawnna tura ei leh bar intodelhna kawngah a thiamna te hman ṭangkai zel tum tlat a ni a. Sawrkar tharin a chhawr tam hman ta lo hi a pawiin a uiawm takzet a ni. Ka thuziak a lo hmuh changte hian a hlimpui vein mi hi a rawn phone vat ṭhin a, a lawmawmin min tih tlangnel phah sawt ṭhin.
Thanpuia ral ni Dt. 11.10.2023 ni hian remchanna lain hma deuhah chhuakin, ṭhiante hmuh khat deuh tawh kum 80 ral kai chinte tlawh hmasa ila tiin ka chhuak a. Pu R Thangkanglova ka tlawh hmasa ber a, ani hi Laipuitlanga awm ve bawk a ni a, an in ka'n thleng chu, "Hei hi Pu Thangkanglova te in a ni em?" tiin kan au chul a, chhunglam aṭang chuan, "Ni e, amah pawh a awm e, lo lut rawh," tiin min lo chhang chu an in sir dawr kawngkhar lam aṭang chuan ka lut a. Sitting room-ah lo ṭhuin a hma dawhkanah chuan ni tin chanchinbu leh tui in turte a lo inchhawp a. Kan inchibai a, "Min hria em?" ka'n tih chuan a ngawi vang vang a, keimah ka insawi ta zawk a
An veng ka kal chhan leh kan inhmuh khat tawh avanga han tlawh zawk ka nih thute kan hrilh a, "Khawi vengah nge in awm kha?" tia min zawhte chu chiangkuang taka ka hrilh hnu chuan a nupui nu hleitling, la nula tak leh a fanute nen chuan kan titi ho ta chul a. Pu Kanglova hi Basic Agriculture leh Extension Upper Shillong-a zir chhuak hmasa zinga mi niin, Kolasib CD Block hawn tirha bul ṭantu zinga mi Gram Sevak hna thawk ṭanin, Mizoram Bar Association-a Ukil lar tak thawk tura inzir chhuak leh a ni a, chanchin ngaihnawm tak tak sawi tur ngah tak a ni. Kum 80 ral a kai thui ve ta deuh a ni ang, rei vak lo kan inkawm chhung hian a zawh ngai min zawt zing ve tawh khawp mai, a bengte a la chhèt lo va, muang mara kawm tham tak chu a la ni nain, ṭhenawm hnai deuh te tih loh chu a thleng tawh meuh lo ni tur a ni. In leh lo nuam takah a khawsa a, tunhma deuhva an Varanda leh kawngkharpuia amah ràwn leh hmu tur insulpel zut ṭhinte mitthlaah hmu chungin a kum 80 kai tlin lawmna chibai; Bar Association Office-a ka va buk ni leh ni tin chanchinbua kum 80 ka tling ve ta tih a ziakte ka hrechhuak a, tunah a bang liam thui hle tawh a ni. A ngaihawmin ni tin office lama hmuh tur a awm ta meuh lo hi khua a tihar khawp mai.
Hemi ni Dt 11.10.23 Pu H. Thanpuia ral tura ka chhuah hma lawk hian Pu F. Lalremsiama IPS Home Commissioner Retd. Ex MLA ZPM Val upa council member senior-in min rawn phone a, ani hi ka articles mawl te te ziah ve ṭhin lo chhiar ṭhin leh, lo tuipui ve ṭhintu a ni a. H. Thanpuia ralna hun kan hmang zo chu Pu C. Lalniliana Agri Director Retd. nen Pu F. Lalremsiama kan tlawh haw leh a, hemi nia ka article ziah, “Kum 80 i tling tawh em?” tih Aizawl Post-a chhuak chu chhiar tumin a darthlalang lens ṭha leh lian nen chuan dawhkanah a lo inchhawp a, chibaite buka chhuah leh mai kan tum nain a teuh lo mai, an nu Pi Tluangi Chaltlang nula hmelṭha ṭhin pawh kum 80 a bang liam ve viau tawh nain a la ṭhain a viak a la ṭha. An naute buh ṭhap leh a hum lo haiin a phe sek chungin; chhang tui tak leh thingpui in loa chhuah a remti lo.
Pu Remsiama in hi ka vawi khat luhna a ni a, a pawn lama a lan ang aiin a chhung han luhin a nuamin a ropui danglam tlat, ngaihtuahna min neih thuitir kher mai. Amah hi IGP Home Commissioner, Ex MLA ni tawh, fate puitling tak tak MCS leh Officer te nei a ni a. Kawngpui an veng chhungah pawh lang larh leh mawi uchuak taka kal vel apiangin, hei tu building nge tih tur khawpa sak pawh ni se, miten awm reng an ti ang. Mahse a chhung han thlir vel hian a nuam tlat a, corrupt lo a ni tih sawi vak a ngai lo. Nupa kawpchawiin kum 80 chuang fe niin rei lo te chhung an bula awm a nuamin a khamawm loh khawp mai. An bengte a la chhet lo va, an kal dim deuh tawh e tih loh phei chu sawrkar tharah pawh ràwn tlak leh khaipa ber a la ni thei ngei ang. Kan chhuah dawn chuan, "Pu Siam, ka articles-te hi a ho mai mai mang e i ti deuh ṭhin lo maw?" ka'n ti chu, "Ti lo ve, hetiang lam thu hi senior upa lam phei hi chuan kan chhiar duh zawng tak a ni a lawm! Taka, Ruotmawii te nen zaia rawng in bawlho a; Zoram dung leh vang I fanpui chanchinte kha rawn ziak teh a, a ngaihnawm dawn em mai," te chu min la ti ta deuh deuh va.
Pu Remsiama in aṭanga kan chhuak chu DIET peng lamah Mizorama awm hmasa ber kawng chhawng kan ti dawn nge, Fly over an ti zawk chunga kan tlan chu kan hlimin kan khék thla uar uar a. Aw! kan Chief Minister ruahman anga Bawngkawn pheia thirphek ban lian phun a, Fly over-te han siam hman ni se, Sakawrhmuituai tlang aṭanga Durtlang–Chaltlang thlenga Rope way an ti nge; Sky walk te kha pamṭul lovin han siam zo se zawng, keini putar kum 80 chunglam ho tan tak hian a va hlu dawn em, ti chungin a siam thei ngei tur sawrkar thar lo piang tur beisei chungin kan tlan ta zel a.
Kan in ka zuk thleng chu kan nu Lianhmingthangi, Kum 80 tlin lawmin kan veng Zotlang nu 20 dawn chhun ṭawngṭaiho chu Birthday sawhchiar siamin an lo ri map map a, sharing te neiin ṭawngṭai rualna hunte an lo hmang a, an zingah hian kum 90 chung pathum leh kum 80 chin pawh an awm nual mai. Anniho hi pachang lam hian kan tluk lo, Birthday inlawmpuite, tar khawhar lo tak nihte hi an thiam khawp mai. An zingah hemi nia ka article buatsaih ‘Kum 80 i tling ve tawh em?’ tih chu ka chhiar chhuahsak a, an lawmin tar khawhar lo leh kum 80 tling pha ngei tura ṭan lak ṭheuh pawh an tum viau a ni.
- Lalhmangaiha Sailo
Holy Cross Bakery
9436360275