ZORAMAH POLITICS-A HARH THARNA ROPUI!

Khawvel pian tirh ata Zofaten politics kan hmelhriat ṭanna chu kum 1946, 6th April kha a ni a. Kumpinuin India ram pumpui a awp lai a ni a. Assam sawrkar hnuaiah Lushai Hills District kan ni a, Kumpinu aiawhin Bawrhsap pakhatin min awp a. Zoramah politics a rawn lut dawn hnai tih a hria a ni ngei ang, Bawrhsap ARH. Macdonald-a chuan Mizoten politics kan man fuh lo vang tih hlauvin, " Politics chu chem hriam tak ang a ni a, in hman thiam loh chuan nangmahni intihnat nan in hmang mai ang," a lo ti a. Thil ṭha tak pawh hi a hmangtuin a hman dik loh (miss used) miau chuan chhiatna leh buaina thlentu mai a ni zawk thei a ni. Alfred Nobel-a pawhin dynamite a hmuhchhuah chhan chu, motor kawng laihna atan te, lei chhungrila lunghlu lakchhuah nante a ni a. Mahse, mihring leh mihringte inbeihna atan te, indona atante an hmang ta zawk tlat a, a pawi hle a ni.

Tichuan, kum 1946-ah Mizorama political party hmasa ber chu din a lo ni ta a. Bawrhsap Macdonald-a hlauhthawn ang ngeiin, Mizorama poitics a luh hnu rei lo teah chuan mahni leh mahni kan inbei ta chat mai a! Zoram hmun tin maiah lal ban ngiatin hmalak a ni ta a. Kan Mizo lalte chu bang tura nawrin, lal inte an vawm ta ruih ruih mai a! A tawpah chuan Mizo lalte chu chu1954, 15th August-ah ban an ni ta a ni. (Mizo Union Kha (1946 -1974), 2008 by K. L. Chhuanvawra, page no. 71)

Amaherawhchu, State ṭhenkhat leh hmun ṭhenkhatah chuan, India independent (1947) hnuah pawh an lal an la bán ve tlat lo! Pu C Zorammuana, IPS (DIG Retd), Ramhlun North, Aizawl chuan heti hian a lo sawi tlat mai, "Kan ṭhenawm Manipur, Meghalaya leh Chin Hills-ah chuan lalte hian anmahni ram bik an la nei a, chu laiah chuan thuneihna thuk tak an la nei. Chung zinga lal la awm, Pu Vanchuha chu 2013; a thih hma zawng khan Chhunchungah hian a lal a, ka lehkha pawh min rawn chhang a ni. Ani hi Chawnhlun hnam a ni a. Chhunchung khaw tuikhur mawng hi Kolodyne/Chhimtuipui/Boinu hnar ziding a niin an sawi. ('Khualzinna Ram' 1st edition, 2015–C. Lalruatliana; 'Chawnghlut lo chhuahna Bul' by C Zorammuana, page no. 72)

RAWNGBAWLTUTE ZINGAH HARH THARNA A THLENG: John Stott-a (Pastor, theologian, Evangelist) chuan, "Politics chu a bawlhhlawh em mai tia i hlamchhiah a, i ngaihsak duh loh luih chuan, mi bawlhhlawhte thuhnuaiah i ram leh khawtlang, i chhungkua chu i kalsan dawn tihna a ni ang," a lo ti.

Geneva chu Switzerland ram khawpui pakhat a ni a. Tunhma chuan zurui vàk mai mai, mi rethei ṭawp tak tak, khap lo se chu kutdawh pawh a za rual awmna tur chi a ni. Kawtthler a chèp a, a bawlhhlawh ve hle bawk. Thingtuah turte hi khawlaiah a darsarh niai nuai a. An inte chu lung bang deuh vek a la ni a; mahse, meikhuchhuah pawh nei mumal lo deuh vek an ni. Mi hausa leh rethei an inthlau hle a, sáwn hi an tam hle bawk. Protestant khawpui a nih avangin a bika harsatna an neih chu ram hrang hrang aṭanga sakhaw raltlanho tlankhawmna a ni. French ram aṭang ngawt pawhin kum telin sang rual an lut ṭhin. John Calvin-a chu raltlan pangngai a ni ve chiah lo va. Paris tlansan ve tho, Geneva siamṭhat hna thawk tura Farrel-a sawm luh a ni. Chutiang khawpa khawpui ṭawp leh bawlhhlawh chu John Calvin-a chuan, khawvela khawpui fai leh thianghlim berte zingah a siam thei a ni.

Tunah hian kan Zoram khawpui ber mai Aizawl pawh hi, John Calvin-a hunlai vela Geneva khawpui ang maia ṭawp leh bawlhhlawh kan lo ni ta! Kawtthler a zim em em a; motor kawng tam zawk chu motor car pawh inpelh hleih theih loh a ni. Ruah bawhawk a rawn sur a, kawra kan bawlhhlawh paihte chu a mualpho thei ang berin a rawn vawrh chhuak ṭhin a. Tuihawkin luan ngaihna a hre ṭhin lo va, motor kawngpuiah khûp thleng thlengin tuihawk dai tur a awm ṭhin. Aizawl khawpui daifem, Workd Bank Road leh hmun fianrial deuhte chu, ruihtheihthil ti leh nula tlangvalte intawllenna leh nawmchenna a ni deuh vek a. Chu'ng chu kan sakhaw puithiam; Pastor, Minister, Revival Speaker-te harh tharin, tlaivar dawn dawnin chhanchhuah hna an thawk ṭhin a, mahse, ram hruaituten an vei ve takzet si loh chuan a sawt tur angin a sawt mawh hle! Kan ram Politician-te hian kan ram tundinnaah an hlawhchham (fail) chuan, John Calvin-a ang hian kan sakhaw puithiam, Pastor, Minister, Speaker, adt huaisente hi an la rawn pen chhuak ngei ang tih hi a rinawm hle a ni.

Heng, a chunga kan han sawi bakah hian, Zoram chuan a chhe lama 'Ber' nihna kan nei nual, hetiangin; (1) India ram state-ah corruption hluarna ber State, (2) Hiv positive vei tamna ber state, (3) Cancer vei tamna ber state, (4) Hmeithai tamna ber state, (5) Ei leh bara intodelh lo ber state, (6) Zuk leh hmuam ti nasa ber state, (7) Education quality hniam ber state, (8) Leiba ngah ber state. Bible-a kan hmuh angin; 'Hnam tin zingah tihelna leh a chhe lama tehkhinnaah ka siam ang che u," (II Chrinicles 7:20) tih chu keimahni Zofate chungah pawh hian a thleng ve ta a ni mai lo maw?

Heng zawng zawng avang hian, kan sakhaw puithiam; Pastor/Minister/Revival Speaker/Kohhran/Corps rawngbawltute chuan, kan dinhmun chhiatzia leh hmasawnna ruhrel, adt lama kan ṭhenawm state te kan la umphak lohzia hriain, thinlung puak kehin pulpit tlangah leh a remchanna hmun apiangah, rorelna dik an auchhuahpui ta chuah chuah mai a nih hi! Hetiang em ema kan sakhaw puithiamte leh Revival speaker-ten huaisen taka ram rorelna dik lo ngaimawha huaisen taka an auchhuahpui chuah chuah hi a la awm ngai lo!

ṬHALAITE ZINGAH POLITICS-A HARH THARNA: Zoramah politics a lo luh phat aṭangin Zofaten politics awmzia leh politics hi eng nge a tum tih pawh hre mumal lovin kan ar khawthim dai a. Politics chu ram leh hnam siam ṭhat nana hmang lovin, mahni tana chakaikhawrhna hmanrua atan kan hmang ta tlat a! Kan ram siam ṭhatna tura central aṭanga sum (budget) lo kal chu, kan mipuite aiawha kan thlanchhuah politician (MLA) te chuan dik lo takin an lo enkawl ta ṭhin a ni.

Mahse, kan ṭhalaite hi politics-ah an harh thar nasa tawh a. Kan ṭhenawm state te chuan hmasawnna kawng hrang hrangah min lehpel nasa tawh hle tih pawh kan ṭhalaite hian an hai miah lo A chhan chu internet khawvelah kan awm tawh a. Kan ram hnufual bikzia te, kan state corruption hluarzia te leh ruihhlo tamziate hi keini nu leh pate aiin an hre chiang zawk hle a ni.

Mobile phone la chhuah hma, newspaper leh radio ringawta kan innghah lai kha chuan, politics hmanga inbumna te, dawta politics inchirhthehna re, politics hmanga inpuhchhiatna te, adt chu a finfiah zung zung theih loh va. Tunah, mi tinin mobile phone kan hum fur tawh hnuah hi chuan, politics thila dawta inbumna te, politics thila dawta inpuhchhiatna te adt chu ni hnih/khat lek chhungin a dik lohzia a hriat zung zung theih tawh a. Media a chak tawh a, tunlai kan ram politics vir velte pawh kan ṭhalaite chuan an man thiam tlangpui tawh a.

Tunhmaa nu leh paten fate bulah, "Chumi party chu i vote vek ang aw," an tiha an vote mai ṭhin ang kha a ni tawh lo va. Kan ṭhalate hian rilru nghet tak an nei ve tawh a. Kan pi leh puten emaw, kan nu leh paten emaw, "Uṭawk pawh ni se, chumi party chu ka vote ang," tia an party an sahuai thing vawn tlut ang kha kan tlansan tawh a. Kum 36/37 chhunga kan ramin hma a sawn chak loh dan te, kan ram hmasawnna ruhrel, ei leh bara kan intodelh loh dan te, kawlphetha (power) lama hma kan sawn chak lohziate, adt chu kan ṭhalaite hian an hre vek zel tawh a. Kan politician zingah a sawia sawi ringawt chi te, a tak taka thawk chi te an hai hek lo! Media a chak tawh em em a, ṭhalai rui lo hai lote chuan kan ram politics boruak vir vel hi an ngaihsak tawh a, an ngaihven tawh bawk a, chuvangin, Zoram ṭhalaite zingah politics-a harh tharna nasa tak a thleng mek zel hi a lawmawm hle a ni.

BLOCK/UNIT/etc LAMAH HARH THARNA A THLENG: Tunhmate chuan eng party pawh khan, Bloc level, Unit level, adt khan inthlan dawnah MLA candidate te hnenah sum an dil sup sup ṭhin a. Candidate te tan pek loh ngam an ni si lo. Candidate khan sum a neih loh pawhin, an party chhunga mi hausate sum an hmansak pawp pawp mai a. Kha MLA kha a lo tlin hlauh chuan, mi hausa sum inthlan dawna a lo hmansak rulh leh nan; Zoram develop-na tur, Central sum (budget) kha an sawk ta nghek nghek ṭhin a. Chu chu ramin a tuar a, mipuiin kan tuar a, vawk vulh chaw pek ṭhat loh ang maiin ram development a zuang thei lo va, vawkte vulh ṭhang thei lo ang maiin, ram leh mipui kan ṭhan a ṭhu a, chutih laiin kan ṭhenawm State te chu an ṭhang uak uak si a nih hi!

Amaherawhchu, kumin 2023 MLA inthlan dawnah hi chuan, Zoramah politics harh tharna ropui tak a thleng tlat mai! (Party zawng zawngah hian harh tharna hi a thleng vek em tih chu ka hre lo va!) Party ṭhenkhatah chuan, inthlan dawna an party candidate hnena sum dil tawh lovin; Block/Unit/ etc te chuan – buh tuh, rora chhut, huan sam, balu/bricks thiara inhlawhin, an sum hlawhchhuah chu, an Bial Candidate hnenah an hlan ta zawk ṭhin a ni. Hei pawh hi Mizoram politics history-ah thil la thleng ngai lo, politics harh tharna ropui tak a ni.

TLANGKAWMNA: A tawp berah chuan, tun kum 2023 MLA General election hi Zoram dinchhuahna leh tlukchhiatna tur darthlalang pawimawh tak a ni dawn a. Zoram mipui aiawha roreltu tur MLA 40 kan thlanchhuah dik chuan, Zoram hi a tho leh ang a, hmalam panin ke a pen leh ang. Kan thlanchhuah dik loh erawh chuan, mi dik lote rorelna hnuaiah kan ram, kan khawtlang leh kan chhungkua chu a tlu lut ngei dawn a ni.

Lehkhabu rawnte:

(1) Mizo Union Kha (1946- 1974)–K. L. Chhuanvawra.

(2) Calvina Zirtirna & Mizo Nun–Calvin Study Centre, ATC, May, 2022 (Edited by Rev. C.Lalhlira)

(3) Political History of Mizoram–V. H. Khuma.

(4) Mizoram Politics Chanchin (1952 hmalam)–H. Vanthuama.

(5) Mizoram General Knowledge–5th edition -R. Lalhmangaihsanga.

(6)'Khualzinna Ram' - C. Lalruatliana, 1st edition, 2015

(7) Google (internet)

- Ruata Chawnghlut (rlc)