SEDP inhnialna leh dâwt

Kum 2018 khan Pu Zoramthanga hian bân phar da da chungin "In dawng dâwn," min ti. Amah tho hian mahni loa kan feh chungin hlawh kan nei dawn min ti thul. Pawisa pek min tiam zat chu Nuai 3.

Pu Robert Romawia Royte chuan Nuai 3 an sem chian tur thu a sawi nawn. Hnam Runah Nuai 3 sem theih a nih thu a sawi rualin sem thei loa ngai chu 'Mawl' min ti. An sem thei loa an mawl hle a ni ta mai ang chu. 2018 khan Nuai 3 hmangin an campaign chiang a ni.

Pu Zoramthanga sawi tawh chu a naute zinga amah nghèng hnai tak Pu Robert Romawia Royte chuan, an sem ngei tur thu Hnam Runah a nemnghet tawh. Minister Pu C Lalrinsanga chuan an la sem ngei tur thu pawh a sawi tawh. Tun hnaiah Information Minister Pu Lalruatkima chuan Nuai 3 an tiam lo tih a sawi leh si. Pu Ruatkima hian Pu Zoramthanga a hnial em ni? Pu Robert-a hian Pu Ruatkima hi mawl a tih in ring em? Nuai 3 sem dan tur pawh a sawi si lo. Kan ram hruaitute hian dawt leh dawt leh dawt leh dawt hi min hrilh reng mai. Heti hian Mizo mipui hi min bum tawh lo se a ṭha a ni.

Thil hriat fuh loh palh hi chu mipuiin an hre hrethiam a, thil sawi sual palh pawh an ngaidam thei a, thil hriat tawk loh vanga sawi pawh an hrethiam a, mahse dawt chiang taka inbum kual hi chu mipuiin an hrethiam thei lo. Kan hotute hian dawt min hrilh tawh suh se.

Assam Rifles chungchangah pawh dawt tho min hrilh tawh. An insawn chhuah tur thu Chief Minister in 2019 khan a puang tawh. Lunglei Municipal Council inthlan dawnah an puang nawn leh tawh bawk a, mipui hi dawt min hrilh nasa ta. Kawng chhawng leh Health Care ah hian min bum nge an sawi sual nge dawt an sawi?

Mipuiin kan ram hruaitu kan thlan turah hian dawt lehlang sawi zung zung hi min hruai turin kan la duh em?

Kan ram neih chhuna kan ram hruaituten dawt hrilh tawk lekah mipuite hi min ngai a nih chuan, mipuiin dawt angin kan beih let a ngai.

- Lalramthara