PLASTIC TUIZEM LEH LSC A SúR EM NI A?

Election a lo hnai leh ta bawk a, thuthang mak tak tak a tam leh tain, mahni insawi mawi hun kan thleng leh ta e. Mahni party sawi mawina leh party dang sawi chhiat mai bakah, thu dik lo vawrhdarha an party-in ṭhatpui dawn tlata ngai pawl ni awm tak lah bo lo. Chanchinbu leh Social media lamte chu rem leh rem lo thlenga inpho lanna (platform) atan a thei theiin an hmang mek bawk a. Building la sak zawh loh thlenga hawn tum thawmte, mahni bial chhunga hna thawh tur a zawna zawngte, a dil lote thlenga vote beisei vanga hna inpek thawmte thlenga sawi a awm. Damlo kanna leh mitthi ralna pawh Mizo society-in kan inpek ṭhin let tam taka pe ṭhinte, in luah man inpeksak thawmte leh a dangte sawi a tam ta mai. Election puan hnu erawh hi chuan Press conference bak chu thil hawn leh lungphum ri a reh ta rih e.

Khawthlang lamah leh Chhim lam hmun ṭhenkhatah phei chuan Plastic tuizem a sûr thute a thlalak nen kan hmu a, MPF khak ngai hiala thuthlung bawhchhiaa ruai ṭheh thawm thlengin kan hria a. Aizawl lamah ngei pawh in hmun pass (LSC) leh tuizem a sur ve tho thu sawi a awm bawk a, G-pay thawm hriat tur lah bo hek suh. A tawi zawngin sawi ila, 'hmanah aiin tunah ka hmangaih zawk che' tih hla kha an rawn sa thar a ni ber awm e! Mipuite hian,"Tunhmate khan khaw' nge i awm, Parte," tih hla kha kan chhanna hla ni ve se; a inhmeh viau awm e!

Kum 2018 election dawna cheng nuaithum sem vek min tiamtuten a kum nganaah cheng singhnih leh sangnga vel min pe hram a, hei hi hmana min tiam, tuna an sawrkar mekna chhan hi a ni.Tuna kan dawn hian kumin election lo awm tura kan vote phahna tur ni lovin, kum 2018 election dawna nuaithum pek min tiam aṭanga min pek theih tawk, an thutiam an hlenna beitham tak a ni zawk. MPF hi an ṭangkai em em rual hian Kohhran hrin a nih vang nge, report fel tak an dawn loh hi chu an bawh zui chak lo deuh ni hian a ngaih theih a. MPF hian member a ngah bawk a, tun ai hian han ṭang leh hretin dan bawhchhia ni ngeia hriatte hi chu han khak deuh se an tawmim deuh ngei ang a, zah leh pawisak an hlawh lehzual ngei ang le.

Election hun an puan tak hnu hi chuan Campaign pawh MPF hriatpuina zel a nih tak avang hian a ziaawm viau a. Campaign thawm ngaihthlak nuam tak tak, mi dang sawi chhe lova pawl thil tum au chhuahpui mai leh, vote tura mi dang sawm maite pawh an awm a, a tawk hle a ni. Hetih laia mimal sawichhe zawnga campaign leh pawisa leh therhlo sem ruk thawm a la reh lo cheu erawh hi chu a zia lo hle a nih hi. Mihring rilru piangsual laklawh, Revd Chuauṭhuama'n 'thluaka sum lut' a tihdam theih loh a tih; veitute hi chuan an eiruk sum bawk hian mipui vote an lei leh ṭhin a nih ber hi.

Mipuite lah hi kan harh thei lo (duh lo) rei ta hle mai a, inthlan dawna pawisa leh bungrua tlem hmanga tihlungawi theih hi an la awm zel si a. Ran leh bungrua ang lekah mipui hi min ngai a, kan retheihna denchhena kan chanvo an eiruk hmanga min lei let an tumna hi mipui hian hnawl phal ngat ila, an sim mai ang. Mipui hi min duhsak tak tak a nih chuan inthlan hma daih khan min ngaihsak ang hmiang, inthlan dawn chauha min hmangaih anga langte hian 'lém ang min lo der leh ta' a nih hi. Pawisa awm loh chhuanlam fo kha inthlan dawnah a awm ta thut a nih chuan khawia pawisa nge ni ta ang le? Ram hmasawnna tur leh mipui sum tur a ni tih hi kan ngaihtuah ngai em le? Plastic tuizem leh Lsc chu lo sur pawh ni se, thlemna do zo Mizo kristian, mi rinawm leh dikna ṭana ding tam tak ram tana ding tlat kan la awm e.

- Biaki-pu, Aizawl.