INSUM THEIHNA

Insumtheihna hi mihring nun kawng dika hruaitu a ni a, a tel lo chuan hringnun hi a tluchhe thuai 

ṭhin. Insumtheihna chuan damreina a thlen a, mihring nun a timawiin a tihlu a, dinhmun sang takah a hlang kai ṭhin. 

Mi insum thei lote chu mahni inngaihlu, mahni thu duh tak, midangte thurawn ngaithla peih lo tak an ni zel. Mizote hi kan ṭhang chak a, mahse insumtheihna kan tlachham hle a, mi tih ang tih ve mai kan hreh lo bawk. 

Mimal tin nun hi inbihchian chuan addict pakhat tal kan lo nei ṭhin, chungte chu insum theih lohna avanga kan sim theih loh te an ni. 

Mi insum theite chu an hmel a mawi a, an nun a hlim ṭhin. Infiam mite tan pawh insumtheihna hi hlawhtlin pui tham a ni. Mizorama mipui nawlpui hi ruih theih thil bakah zuk leh hmuam ti deuh vek, insum tum lo kan ni. Tunlai hian Mizorama Kohhran ṭhenkhat chuan an member puite Kohhrana chanvo nei, zuk leh hmuam tilui tlat, nghei tum lote chu an rawngbawlna an chawlhtir ta hial mai. An tiṭhain entawntlak an va ni em! 

Insum thei lo, chet nghal buan buan chingte chuan rah ṭha chhuah lovin hmingchhiatna an thlen ṭhin. Pawl leh mimal nunah te zuk leh hmuam, ruihtheih thil tihna lakah insumtheihna chuan hringnun hi a veng him tlat a ni. 

Mipat hmei­chhiatna kawnga insum theih lohna chuan buaina nasa tak a thlen ṭhin a, lei chawina te, lungin tanna te, nupa inṭhenna te, nunna hial in laksakna te a thlen ṭhin. Chumi piah lamah chuan, fahrah, khawlai fa sawn kan tih te, enkawltu nei lo naupang an tam phah a, heng chhungkaw keh chhia (broken family) ah te hian ruihtheih thil tihna chance a sang em em bawk a ni. Naupang leh ṭhalai home-a enkawl sen loh an lo awm phah ṭhin. .

Heng thil ṭha lote lo thlen chhan bul ber chu insum theih lohna hi a ni tlat. Ei leh inah pawh hian kan taksa in a mil loh leh a ngeih loh zawngte chu ei lo ngam tlat ila, chu chu kan taksa tana ṭha a lo ni reng ṭhin. 

Kan nitin nun­ah Mizote hian insumtheihna hi kan vawn nun reng theih nan Lalpa hnenah chakna dilin ṭan i la thar zel ang u.