Hremna lam hi...

Kum 2014-a MLPC bill khel a nihlai khan a hlawkna tur leh a nghawng tur lam te chanchinbuah a inlan chhawk a. A hlawkna tur umtu leh tuipuituten ṭanfung an vuan fuh bawk a, an thu a vawng ṭha thei hle. A seltu lam pawhin an tuipui em em tho, an ngaihtuahna erawh a thui deuh zawkin a lang. Mahse Act a ni ta tho a, 2015 aṭangin hman ṭan a ni nghal a. Bill pass tawhah chuan hman ran pawl tak a ni awm e.

A tira dan an duan aṭang chuan a felfaiin a pawmawm hle a, khap bur loa khap a nih avangin daitheu kan tawk erawh an awm ngei ang, tih a rin theih. A tak ram kan han dai ta cheng a, hrem dan pawh a ṭha thawkhat viau mai; mahse inthlahdul a awl hma lua.

A pawi thui hmain ni hmasa lamah khan Vanglaini-ah police thu chhuah kan hmu kha a rim ngai thei lo tan thlamuanpui tham a tling. Mahse a dan leh hraiah hriat chian ngai leh a hremna danah khawng zawka vilik ṭul a awm. Rual u te khan han thailang thei ula ka va duh em.

Dana a lan dan chuan kum 21 hnuai-lam tan leh card nei lo tan lei theih loh a ni a; lei tur leh lei tawk erawh an awm reng thei tlat. Dan anga zuartute hnen aṭang chuan a nih ka ring chiah lo. A leitute chu tute pawh lo ni se a hremna hi a pawimawh zawk chu a ni. Dan siam hi tha hle mah se a lekkawh lamah kan pachhiat leh si chuan mahni hmel kan tibal mai zawk a lo ni.

In tura kan lei chu a ruk-a-rala in tur ni ngeiin a lang. Mipui punkhawmna leh vantlang hmunah te, motor khalh laia in te khap a ni. Hetiang hun leh hmuna thli chhuaka in ta bawrh bawrh erawh hmuh ngai loh thil a ni.

Hei aia fet zawk hian ni ta zawk se. In nam tawh tan puipunna hmun tlawh pawh khap hial te a ṭulin ka va ring em! A rim mai pawh hi boruak chhia, hriselna tibuai pha a ni si a. Kan executive body te an hah teh reng nen, an la tan zual sauh chu a ngai a ni lo maw?

Chapchar Kut hlim takin kan hmang liam a, a tula report mawi lo zet, lawmawm si pakhat chu rui an mankhawm kha a ni. Puitling lam chu a nih nihin ni se, nau-pangho mawlh kha. Kumtling lo an ni tih finfiah hnuah an sezawl chhuah ta niin ka hria. A pawi teh e. Khangho khan kawia mi nge ruih tur an neih mai le?

Chu ai chuan nau-pangte hian dan an bawh chhe ve thei lo em ni? Juvenile Justice Board lamah kalpui ta se an hmalam hun a eng deuh lo ang maw? A la famkim lo. Ngaituahna i seng ho ang u.

- David M Zothanmawia