CAMPAIGN VAWRTAWP A THLENG TA

Tun ṭum kan inthlang tur zet chu a ropui thawkhat e, Party lian zingah a tling tura beiseisa deuh pawh an awm meuh lo em ni chu aw! tih turin ni danga lang ve ngai meuh lo BJP pawh central lama an hotu Minister rual chenin an rawn campaign zut bawk nen, anni hi chuan kan ram hi Hindu Sakhaw be vek tura min hruai tum dawn ni tea kan rin deuh roh avangte hian, sum rawn tawktarh deuh dawn mah se an tla na vak lo turah ngai ila. Anni bak, Pu Zaichhawna ho te leh Mimi-te ho Thlarau leh Zawlnei rawngkai lam deuh riaia langhote pawh hi an tla na vak lo turah ngai thla rawk bawk ila.

Party Pathum MNF, INCC leh ZPM te hi an innawk chho deuh rup rup turah ngai ila, an Campaign thawm aṭang hi chuan, an thawm a ṭha tlangin, han filawr deuh leh chak ber tur awm rin thiam a har hmel khawp mai.

MNF hi Sawrkhar lai an nih mai bakah an term hmasa lama lo Sawrkhar tawh an ni a, an Candidate hote hi an hausa thawkhatin, mi ngelghet leh mi thiam tak tak te an ni a, hruaitu dang hotu kaihhruaina hnuaia awm ni se tih leh, MPF te sir aṭanga mi harsa ṭanpuitu an dapchhuah thiam leh Damlo kan tura an phèt sek ang hi chuan, an term chhungte khan han tál vel se chuan an huphurh awm lehzual hle ang. Zoram sum leh pai, Pu KAMRULA te an deh chettir ang hian Contractor dang rintlak tam takte hi han ring vein, khawih chettir ve phei se zawng; an huphurhawm lehzual ngei ang le!

MPCC, anni hi an ropui a, an nek vel a khirh teh lul ṭhin nen, Term khat han sawrkhar loh pawh lang thama ṭhuanawp hman an ni a, an President Pu Hawla chawl leh Pu Sawta an thlak hian an Party boruak a vawrhchho aiin, an hnung tawlh deuh em ni chu aw tih turin MLA hluite ni laite chenin an thothang a ṭha lo va, an inbansan nual nen; inthlan puan phutin MP hlui meuh pawh a barakhaih a, chhuanlam fahrah te te hmangin Party ṭhangmek ZPM-te a puhmawh ta mai mai em ni tih turin a lang a. Mi thar chak tak Prof. Lallianchhunga te, ṭhalai Sawma te han tal vel leh, Rahul Gandhi te hial Campaign turin an zuk chah chhuakte hian a tiphur thar a, Candidate tur pawh innawr buai lem lovin mi tharte nen an tifel a, tuna an boruak han thlir hian sawrkhar siam thei tur hian mipui rin kai zo tak maw!

ZPM, anni hi Pawl thar ṭhangduang tak niin Bial viltute an inruat hma, inthlan puan phût pawhin a barakhaih lem lo ni tur a ni. Candidate nih inbeisei, chanve tak loh avanga pawl chhuahsan awm nualte hian Party thar si; beiseina a tisang zawk a. Kalphung thar mipui Sawrkhar siam tum an nihna hian Party dang aṭangin leh Pensioner aṭangte Rawngbawltu Zoram siam ṭhat duhtu leh ṭhalaite hian an bawhin an thlir ṭhup ni hian a lang a. Neutral-ho Zoram siam ṭhat duh em emtute ṭanpuinain ZPM hian sawrkharna an siam thei mai lo'ng maw tih chu, mipui thlir leh mit fukna ni awm tak a ni.

Hetia ka thlir ve mek lai hian khaw' nge kei Putar Lungleng ṭhut hmun aṭang ngawta ngaihdan lo siam ngawt lovin, dai hnai deuhte tunhma vanglai chettlatna lamte hrut ve ila, tiin ṭhianpa Hranga nen kan chhuak ve a, ṭi deuh tak chungin kan Motor Car ah ZPM Flag kan tar phe ve vat vat a. Aizawl South III Sateek tlangdung phei, Dampa Bial Ailawng, Reiek, Rulpuihlim – Mamit leh Hachhek Bial thleng dawn dawn leh Aizawl Town Area, Durtlang, Sihphir leh Zemabawk te kan hrut vel a. Election Campaign ve e ti lo chuan Vanglai sulhnu fang vel ang maiin, Party mi ni lem lo ṭhian hluite kan tlawh a, nunhlui hun titi bawrh bawrh chungin hre thar phut ni awm takin tun ṭum sawrkhar tur; ZPM-ah aw le kan ti phut a, tun ṭum chu i thu thu a ni mai an tih chuan, ka ngaihte a tiṭha ve mai a.

Durtlang leh Sihphir ka thleng chho erawh Durtlang, Sihphir, Zanlawn kawng zauh mekin min tisukuk deuh va. Aw! heng project te hi kan hotupain a rawn sawina a rei tawh nen, zawh hmana thawl taka Campaign tlan vel ni ila, Bialtu hming pawh ṭha deuh zawk awm tak a nih nen tiin, Sihphir chhak Sakawrhmuituaitlang, ni tla turin a chhun en leh Skywalk inkhai insulpel zut zutte mitthla chungin, a sira hman kuma kan hotute Pu KL Lianchia MLA hote’n Chief Minister Pu Zorama huan hungna Goat Proof Wire Net leh, a ban Iron Angle an chhêk hnuk an han enna hmunte chu ka hre chhuak a, Zoram hmasawnna tur hian, kalphung thar mipui Sawrkhar aṭang lo chuan Ram hmasawnna leh ei leh bar intodelhna tak tak hi, tun ṭuma kan thlan tawh loh chuan Israel ten Hamas-ho an phin darh angin Zoram hi sual leh hlemhletna hian a la tichhiain, a phin darh ngei ang; te ka ti ta vel mai mai a.

- Lalhmangaiha Sailo

Holy Cross Bakery

9436360275