PARTY POLITICS Vs RAM POLITICS

Mizoramah hian MLA Bial 40 kan nei a, sawrkar chuan chu bial 40 zawng zawngah chuan rualkhai takin ram tundin rawngbawl hna a thawk tur a ni. Chu chu ram politics dik leh ṭha (nation-building politics) a ni a, thlan tlin an nihna leh sawrkarna an chelh chhan a ni. Chuvangin, “Opposition Bial, Ruling Bial" tih ṭawngkam te chhuak chhuak ṭhin hi a ṭha lo hle. Kumin inthlanpui lo awm turah pawh hian he ṭawngkam hi a ri tam leh mah mah a ni. Hei hi kal dan tur anga ngaih tlatna te a awm thei dawn a, kan ram politics a kal sualtir thei a ni. A hlauhawm hle.

Lehkhathiam puipui, hruaitu ṭha leh finga ngaih kan Minister leh MLA te pawhin, “Opposition Bial, Ruling Bial" tih ṭawngkam hi inphal taka an hmang an hmang mai hi a mak a ni. Chutiang a ni chuan, sawrkarna siamtu party Minister leh MLA bialte chu Opposition Party MLA bialte aia enkawl ṭha zawk an tum thu tlang hriatah an puang tihna a ni a, hei hi a democracy loh chauh nih lovin, a Kristian lo hle. Party politics tenawm leh hlauhawm a ni. Chutianga thluak a, “Opposition Bial, Ruling Bial" virus lut tawhte chuan ram politics an ngaihtuah phak tawh ṭhin lo. An thuneihna chu anmahni duhsaktute duhsak letna quid pro quo party politics atan hman an tum tihna a ni a, chutiang level politiciante'na an hruai ram nih chu a lungchhiatthlak hle a ni.

Democracy kan hmelhriat vena a rei thawkhat tawh a, he aia puitlin zawk tawh tur kan ni asin maw! Nge kan politiciante hian opposition awm lo, communist ramte anga one party sawrkarna siam an duh zawk vang emaw ni dawn le? Democracy ramah chuan, sawrkar khalh ngilna atan Opposition Party leh politiciante an awm hi kal dan ṭha leh thil ṭul a ni. Chuvangin Ruling Party MP, MLA te leh Opposition Party MP, MLA te chu an awm ngei a, Ruling Bial leh Opposition Bial tih erawh chu India Constitutionah a awm lo. Bial tin hi ram fate awmna bial an ni vek a, an pawimawhna a inang vek.

Ruling Party Minister leh MLA bialte chauh ngai pawimawh sawrkar chu a ram leh mipui sawrkar ni lovin, party sawrkar, huap zo lo sawrkar a ni dawn a, chutiang politiciante leh sawrkar neih ram chu ram vanduai tak an ni. Chuvangin, “Opposition Bial, Ruling Bial” tih rilru, ṭawngkam leh thiltih te hi ṭhansan a hun tawh. Puitlin lam i pan tawh ang u. Eng party pawhin sawrkar se, Mizoram zawng zawng rawngbawltu tan thlan tlin an ni tih hria a, rualkhai takin leh Pathian duh dan angin dikna leh rinawmnain ram an hruai tur a ni. Hei hi an mawhphurna a ni. “Ruling Bial, Opposition Bial” tiha thlei bik an nei a thiang lo. India Danin a phal lo va, kan rinna nen pawh a kal dun thei lo.

Chuvangin, party politics kalpui lo va, ram politics kalpuitu, “Keini sawrkarnaah chuan ‘Opposition Bial, Ruling Bial’ tih a awm lo ang a, Mizoram zawng zawng rualkhai taka enkawlin huapzo sawrkar kan din dawn a ni,” tiha thlei bik nei lo, ram tam hmathlir ṭha neih a, dikna leh rinawmnain ram hruai tura intiam thei leh inpe thei party leh politician-te i thlang tling ang u.

“Pathianin mi duhsak bîk a nei si lo va,” (Rom 2.11), “Ka unau duh takte u, bumin awm suh u. Thilpêk ṭha tinrêng leh thilpêk famkim tawh phawt chu chung lam aṭanga lo kal, êng siamtu Pa hnên ata lo chhuak a ni. Amah chu a danglam ngai lo va, inher danglamin vânglai leh mang lai a nei lo va, thimah min awmtîr ngai lo,” (Jacoba 1.17).

- Laiu Fachhai