INTHLAN URLAWK NUIHTIZA!

Tun ṭum kan ram Assembly inthlanpui campaign chu ka dam sam vak loh avangin hmun fianrial aṭangin ka lo ngaithla ve reng a. Social Media lam aṭangin ka lo bih reng a, ka hman bawk a, party tinte dinhmun leh hmalaknate an han chhuah rengin, han ngaih mai pawhin DIKNA a lal hmel vak awm loh ve ka lo ti mai mai ṭhin. Kan hriat ṭheuh angin party lian deuh pathum :- 1) MNF, 2) MPCC leh 3) ZPM-te a awm a, heng party pathumte hi an insawi lensiakin an insawi ṭhatsiak ni berin a lang. Heng party pathumte au hla leh an innghahna ber hi han thlir leh phawt ila. MNF chuan an innghahna ber chu 'Pathian leh kan ram tan' tih a ni a, MPCC thung chuan, 'Kristian sakhaw humhalh' a ni ve leh a, tin, ZPM chuan, 'Kalphung thar leh eiruk loh' tih a ni thung. An pathum hian an au hla chu a ṭha em em vekin, mahse an chet dan nen hian a inmil hlawm em tih erawh ngaihtuah ngai tak a ni awm e.

An inzawrhna leh an hmalakna ṭheuhte hi social media lamah hmuh tur a tam em em vek a, an ṭawngkam hman erawh an duhtui lo tlangin, zir tur a awm lo va, chu mai bakah kan ṭhalaite hruai khawlo thei a tam fut awm e. An Chief Ministerial candidate-te lah mipui chung lam vek an ni a, mahse hetih lai hian dawheh leh laktlakna awm lo, sual lailet der angin, tîm miah lovin an sawi bawrh bawrh mai a, heng hi zawng a puitling zia lo deuh awm e. Party lianin Chief Minister atana an vawrhchhuahte hi chu vantlang chung lam mi vek an ni a, tluk loh rim nam vek an ni. Mahse hetih laiin, 'Kohhran upa dawheh, Upa zu heh' tih te, an hming lam tel meuha 'Zoram dawheha' ti tea kan sawi pawp pawp maite hi chu a puitling zia lovin, a sawitu ber pawh hi eng nge kan an tih thleng pawhin inngaihtuah a ṭha hle ang.

Kan party liante innghahna ṭheuh han thlir pawh hian kan ṭawng hman duh ṭhinte nen hian a inpersan viau awm asin le. MNF chu “Pathian leh kan ram tan” titute an ni a, an tan chuan dawt leh ṭawngkam chhe tak taka mi beih chu a tih chi hmel loh hle a. MPCC lah “Kristian sakhaw humhim tumtu” an ni a, dawt thu leh thu feikibar han hmang vak chi an nih hmel loh. An hmang a nih chuan Kristiante tan a thlabarawm duh hmel tlat. ZPM lah, 'Kalphung thar leh eiruk loh' zuartu an niin, hetiang thu feikibar tak tak leh sawrkarna fung lo chelh tawhte engmah thawh nei lo ang maia an sawichhe bawrh bawrh maite hi a mak a, kalphung thar kan zawrh bera pawh hi hetiang a nih chuan a ṭhat hmel loh bakah a chakawm loh ang tih a hlauhawm tlat dawn.

Heng kan han sawi tak ai pawha la awihawm loh leh dawt chiang lehzual chu mi thar kan lawm lut tam lutuk hi a ni. Social media han thlir hian ni tin chu sawi loh, darkar tin deuh mai hian Zoram hmun hrang hrangah mi thar a zabi teh meuh an lawm lut vek reng mai hlawm a. Party ṭhenkhat leh a uarzual deuh phei chuan khaw khata an lawmluh ringawt pawh hi a khaw mipui aia tamte zuk ni ṭhin a maw le! Party pakhatin Kawlkulh khua ringawta an lawmluh sangthum chuanga an han ziak lo hmuhte khan a zahthlak deuh chuan a lang. Kawlkulh khua hi a lian ve viau a, mahse a mihring chengte hi sang thum an tlin pawhin an tling tawk lam a nih a rinawm a, chutih laia mi thar lawm luh sangthum han tih ngawtte kha tu nge ring thei ang le! A tu party mah hi danglam bik an awm lo, vawkreka fate vek a tih theih awm e.

Nakin lawkah vote chhiar a ni mai dawn, tah chuan a tak chu kan hre leh mai dawn. Hetih hunah hian tu party nge dawt sawi nasa chu kan hre leh mai ang. Chutih hunah chuan a thinhrik tur chu i thinhrik ngam ang u. Tin, politics a nih vanga dawt leng ta hlea kan ngaihna tlat hi i bansan ngam ang u. Isua Krista zuitu ka ni kan inti vek a, kan zui ber Lal Isua khan dawt chu a duh hauh lo tih i hre nawn fo teh ang u. Ṭhenkhat chuan politics rawng kaia kan dawt sawite hi DAWT VAR kan ti a, pawi lo deuh turah kan dah a ni awm e. Dawtah hian a var leh a dum a awm chuang lo tih hria ila, inthlan dawn a nih vanga dawt sawi pawi ta lo hi a awm a rinawm lo, kan dawt sawi zozaite hian ropuina min thlen a rinawm lo. Kan inthlang tur zet hi chuan kan mizia a pholang chiang hlein a lang a, nuih rukna tur pawh a tam ang, mahse a nihna takah chuan kan mizia hian ṭah a tichhuak zawk chu a nih hi!

- Patrick Z, Chhingchhip.