Electric man to nge to lo?
Mizoramah hian hman aṭangin electric man hi kan chawi tlem ṭhin tlangpui a ni maithei, to hi kan ti sam em em mai a. A pawimawhna te, a ṭangkaina te, a lova awm a hreawmzia te, ngaihtuah hian kan electric chhit man hi a to tak tak em lo chhut ve teh.
Tunlaiah chuan chhung tin deuh thoin (mi hausa leh rethei BPL chhung-kua thlengin) mobile telephone kan nei ta sup sup mai.
Chhungkaw khatah hian puitling member tawh chuan mobile phone kan nei deuh fur hlawm awm e. Ṭhenkhat phei chuan double sim card hmang chi neiin mi pakhat pawhin connection pahnih te an nei hlawm a, handset pahnih pathum nei te pawh kan awm nuk tawh a ni. Chutianga chhut chuan chhungkaw khatah connection chhungkaw member zat aia tam a awm thluah thei awm e.
Mobile handset nei zat hi BSNL, Airtel, Vodafone, Reliance te hi zawt chhuak ta ila chu mobile telephone connection hi Mizoram mihring chanve zat thuak a ni thei hial awm e. Heng bakah hian ṭhenkhat chuan telephone landline an la nei cheu a, chubakah BSNL broadband te leh private siam broadband hrang hrangte pawh an la nei tho mai. Heng telephone te hi private company ta vek a ni a, a man an tih ang angin i he loin kan hmang chu a ni a.
Chutih rual chuan electric ṭangkaina ngah em em, in chhunga eng min petu, lum leh vawt min siamsak theitu, insuk ti awlsamtu, chawhmeh min vawn-
ṭhatsak puitu leh a dang dang, a chunga inbiakna lam chi zawng zawngte pawh a tel lo a kan hman theih miah loh electric hi a hman man to kan tih em em si hi thil in chhut chian deuh chu a ngai lo maw.
Nge sawrkar department a nih avang hian tlawm zawk emaw man mang loa chhit emaw hi kan beisei deuh hlawm emaw ni zawk. Chuti lo nise electric department hi corporation-ah lut ta se tlemin a man hi lo to belh pawh nise kan phunchiar lo zawk dawn em ni ang.
Chhung tin hian electric awm loh changa electric kan hman theih loh vanga thil dang (inverter, bati etc) leina atana kan pawisa sen leh electric man atana kan senso hi khaikhin ta hlawm ila. Electric department aṭanga electric kan chhit man hi a lo to zawk na meuh em le?
A ṭul tawh loh hunah pawh electric eng uar hmuh hian kan electric chhit man bill hi a la to lo a ni ang, kan ren lo em mai.
- Chhara