Aizawl traffic jam thin hi

Kan Aizawl khaw-pui traffic jam nasa ṭhin avanga buaina hi Vanglaini chanchibu-ah hian chhiar tur a awm deuh ziah a. A tih reh nan rawtna ṭha tak tak pawh a awm ṭhin.

Tunah phei chuan taxi in tlan chhawk hial te pawh a ni dawn ta a, kawngpui dang siam thar tumna erawh a awm lo. Chutih laiin khawpuiah hian nitin thla tin mihring leh lir-thei a pung zel bawk si.

Thil pakhat ka sawi phawt ang. Vanglaini-ah hian Mizoram khaw hrang hrang thlalak an rawn tarlang ṭhin hi a hlu ka ti. Zin veivak ngai lote tan pawh thingtlang khua hmasawn dan leh awm dan a hmuh theih a, a lawmawm hle.

Kum 2015 May aṭang khan chep thlain register bu chhah deuhah album anga belin ka dah zel a. Khua 200 dawn lai a awm tling ta der mai. Khawhar deuh changin ka en ṭhin a, a ṭha khawp mai. In khaw thlalak han pe zel ula, Vanglaini pawhin rawn chhuah sak zel se.

Awle, Aizawl traffic jam vanga buaina hi a reh mai dawn lo. Tuna kawngpui awm sate hi lei hnuai kawng ni sela, a chung boruakah hian kawngpui thar siam ni se. ban rinawm tawk leh beam ṭha tak, slap chhah ṭha tawka chhungin kawngpui thar siam ni sel. Kawngpui lun zual laiah tanin a bak pawh siam zel ni se, traffic jam vanga buaina hi a reh thei ang.

Kawng hnuai zawk chu motor rit phurho kalna tur a ni ang a, kawng chung erawh chu lirthei te deuhho tan a ni ang. Kea kalna (foot path) awm ve ve se, junction leh stand pawh a remchang laiah dah zel ni se. Chancmari kawng leh Sikulpui kawn inkar siam zawh aṭang ngawt pawhin kan chhawr ṭangkai nghal ngei ang. Kawng-pui dang siam theih a ni tawh lo a, kawngpui zauh lah a theih si lo; a theih dan kan zawn mai a ngai a ni.

Kawng siam hna hi hna hausa zet a ni dawn a, kum hnih khat leka zawh theih a ni lo ang a, mahse lei verha kawng siam ai chuan a awlsam zawk tho dawn. Ṭhenkhat chuan an huphurh viau maithei a, mahse ruahmanna a ṭhat phawt chuan thil hi a ṭha ziktluak ṭhin.

Central sorkar pawhin kan ruahmanna ṭha tak hi rawn en se Aizawl khawpui awm dan nen an rawn hmu ang a, ruahmanna ṭha chu a puih hreh ka ring bik lo e.

Political party hrang hrang kan nei ve ta tluah a, he rua-hmanna hi Aizawl khawpui hmel ti danglam dawrh tham tur a nih avangin manifesto-ah han hmang se chuan ka vote hlu tak hi ka pek ngei ka ring. Chutiang bawkin ruahmanna ṭha leh hmathlir nei ṭha apiang chu mipuite pawhin an vote hlu tak an pe chak vek ang.

Lirthei leh mihring pung zel hi khap ngawt chi a ni lo a, a pung zel bawk ang; thil lawmawm lam a ni bawk. Kan hausa tulh tulh ang a, lirthei pawh a pung thur thur ang; hmasawnna hi phurritah ngai lo ila, lawm zawk tur a ni.

Tih ve tur erawh kan nei a, hmasawnna chi hrang hrang lo enkawl dan tur ruahmanna ṭha tak neiha tih hlawhtlin hi kan mawhphurhna a ni e.

- F. Lalbiakliana