Manganthlak khawpa lâr chak ṭhalaite
Tunlai chu mahni tawkah ka inseh ruh ve ṭeuh mai a, kan ṭhangthar zawk (han ti ve khanglang ila) awm dan ka en hian lar theihna a nih phawt chuan saruak deuhthawa thlalak hi an zak miah lo.
Kan tleirawllai chuan nula mal hlim chhing deuh awmna lehkhabu kan en chuan a rukin hmu duh mah ila kan zak a, chung nula chu Sapho bak an ni ngai lo. Tunah chuan Mizo nula mal inhlim chhinsiak hi Facebook-ah en tur a awm reng, an tih chhan chu lar chak vang a nih loh chuan puh tur dang ka hre lo.
Han kal thui deuh ta ila tu pawi kan sawi lovang a. Kan zaithiamte pawh hi lar tum ngawr ngawra music video siam an niin ka hria a, hetiang hi hnam dang awm ve maw? Tun hma kha chuan Lalsangzuali Sailo leh Lallianmawia Pachuau-te kha chuan audio album an siam a, an hralh ruih ruih a, sum an hai lut ṭhin kha a nia.
Daduhi khan a album hralhna sum khan Maruti car a lei niin an sawi a, tun hnai deuhah Vanlalsailova leh Lalruotmawii hian an hralh hnem an ti bawk a, AIR lama zaite pawh sum lakluhna a ni tel. Tuna zaite hi chu mahni intihlarna leh sum hekna a ni.
Music Video siam hian a siamtu hian sum a lalut lova, a hek char char a, cable TV operator-te thuhnuaiah awmin an va thehluh chu chhuah turin an dil a, chu chu mipuiin an lo hmu a, chuta 'lar' chiah chu a video siamtute hian an hlep a nia!
Pathian hla sa zinga music video siam taima fal deuhte phei hi chu a hre chiangte chuan an nuih ngei ang. Ka sawi awmzia chu pawisa senga heti zat music video siam peih hi a lar chak thlak mah mah lo maw? ka ti a ni.
Han sawi ta zel ila, Facebook-ah 'like' hmuh tam beiseiin zahpuiawm takin an han inphelh ruak titih a, kekawrte u awrh an han ha vel hi chu an zahpuiawm lam aiin an khawngaihthlak ka ti. Hnam dangin sum an lakluhna anga mahni kan intheh mualpho peih hi chu a zia lo lam deuh chu a ni. Facebook-a i nalh viau a, miin an like sup sup che khan siki pawh i hlawh lova, i thlalaksaktu (camera lian nei) an nui ver ver a, engmah hre hlei lovin nang kha i nui a, a bak zawng hi chuan an nuih ru vek che a nia aw.
Lar chak lutuk hi sual a nih leh nih loh hre lo mah ila lar chak vanga kalsual an awm tih chu a takin ka hmu ve tawh. Manganthlak khawpa lâr chak hi Mizo ṭhalai zingah an tam tawh hle a ni.
- Remtluanga Pa