Motor Vehicle Tax leh Passenger & Goods rate thar

Tun laia Mizoram mipui sawi hlawh ber pakhat ‘Motor Vehicle Tax leh Passengers & Goods Tax rate thar’ chu February 8, 2016 aṭangin Mizoram sorkar Transport Department chuan a hmang ṭan a. Dodaltu leh sawiseltu an tamin chanchinbu leh social media hrang hrang pawh a luah tam hle.

Heta a lan dan chuan Tax rate tharah hian private motor (Non-Transport vehicles) zawng zawng leh auto rickshaw, taxi leh maxicab ten a tlem berah life-time tax (15 years) chu motor man (VAT chhut hma) aṭanga 6% pek vek tur a ni.

Central sorkara Transport Development Council Meeting vawi 35-na thuchhuak chuan lifetime tax hi kum 15 atan lak tura tih a ni (Vide MORTH No.19013/1/2003-T dt.19.2.2003). Hei hi state leh U.T. a Transport Commi-ssioner/ Secretary te hnenah hriattir vek an ni.

Rate thar hmang tur hian buaipui leh chinfel ngai a tam hle a, hun pawh a duh rei deuh a ni. State tinin mahni state motor vehicles Taxation Act leh Rules siam
ṭhat (Amend) a ngai a. Chu chu state Legislative Assem-bly-in a pawmpui (pass) a ngai zel bawk. Mizoram sorkar pawhin rate thar hmang tur hian ‘Mizoram Motor Vehicles (Taxation) Act, 1996’ chu siam ṭhain, ‘The Mizoram Motor Vehicles Taxation (Amendment) Act 2015’ chu 7th Legislative Assembly 6th Session-ah khan a lo pass tawh a. A ṭul ang zela buaipui fe a nih hnuah Mizoram Gazette Notification Vide No. H.12018/71/96-LJD dated 5.8.2015 leh No.D.26011/2/10-TRP/Pt. dated 12.1.2016 chu tihchhuah a ni.

He rate thar hman chung-chang hi Mizoram sorkarin a tih bik anga ngai kan tam hle a, Mizoram sorkar tih bik a ni lova, state leh U.T. dangte chuan an kalpui deuh vek tawh a, Central sorkar thuchhuak liau liau a ni tih mipuiin kan hriat a ṭul khawp mai.

Central sorkar thupek ang chuan motor registration leh road tax zawng zawng hi computerised vek a ni a. Rate thar hi computer software-ah siam (incorporate) leh phawt zel a ni. Chuvangin, Gazette chhuah rual ruala rate thar hi hman nghal theih a ni lo.

Rate tharah hian 6% hi minimum rate a ni a, Andra Pradesh-ah phei chuan 12% rate an la nghe nghe.

Hetih lai hian state ṭhenkhat pawhin private vehicle leh Two Wheeler thlengin an la fai vek a ni. Sawrkar thu chhuak hrim hrim hi kan thlawpin kan dodal nghal tur a ni lova, a chhan leh vang kan chhui chian hmasak zel hi a ṭul takzet a ni. Chuti ni lova Independence ram ang maia inngaia kan duh dan dana awm tum mai hi chu a dik thei ngai lovang.

- V.L.Nghaka