QUO VADIS, MY TEACHER?

Naupang lehkha zir nan pianpui ṭawng a ṭhat bikzia hi UNO peng pakhat UNESCO chuan kum 1953 aṭang khan uar takin a tlangaupui ṭhin a; Mizote chuan kan bengkhawn lem lo. Khawvel ram tin kil tina mi chi tinin tlan pah pawha an chhiar theih tur khawpa fiah hian - “Naupangte chuan pianpui ṭawng hmangin lehkha an thiam thei zawk” (Children learn better in their mother tongue) tih hi an tar kuau mai a; kan mi thiam (ni tura kan ngaih) tam tak hian an chhiar thiam thei ve tlat si lo.

Khawvela ṭawng 7,000 zinga a zatve lai chu chuai lam pan mek an ni a; chu’ng zingah chuan Mizo ṭawng pawh dinhmun derthawng pawlah a tel tawh thu mi thiamte’n min hrilh chamchi mah se thlaphan nachang kan hre miah lo.

Ṭawng hi Pathian thil pek hlu, ramsate laka dinhmun chungnung taka min hlang kaitu a ni. Hnam zia phuar khawmtu, hnam anga min tarlangtu pawimawh tak a ni a, hnam ropuina pawh an literature dinhmun aṭanga teh ve fo a ni. Amaherawhchu, naupang lamin ṭawng an thiam chian tawh loh chuan, chu ṭawng chu a la ral ngei ngei dawn tihna a ni si.

Mizote hian hnam nihna rilzia leh pawimawhzia hi kan la hre tawk lo. Hnam thil chu sawi ve fo bawk mah ila, mi tam ber chuan mahni hma chiah kan hmu. Chutianga mahni hma zawn sial kuak nana hmanraw ṭangkai ber tur nia kan hriat chu English hi a ni a, English thiam nan chuan kan ro hlu ber pawh kan hlan phal mai dawn niin a lang.

Kan mi thiam leh mi ril (ni tura kan ngaih)-te ho ho hian mahni hnam ṭawng rap betin sap sikul kan buaipui luai luai a; Mizo hnam hmangaih lotu leh diriamtu hi an lo awm a nih ngai chuan hmuhnawm min ti ngawt ang!

‘Naupang chu kum 10 tal a tlin hma loh chuan ṭawng pakhat chauhin lehkha a zir tur a ni’ tih hi educational theorists /philosophers ho ngaihdan ding reng a ni. A dik lo ti thei kan awm em? India ramah bik chuan British hunlai aṭang tawhin, vawiin thleng hian education commissions, committee reports leh Natio-nal Policy on Education chi hrang hrangte chuan thu khat vua-in, “Primary education-ah chuan ṭawng pakhat chauh - vernacular/ mother tongue hman tur a ni” an la ti vek. Chumi aia thu thar zawk hria kan awm em?

Pathian thu thiam (theologian) te pawh hian, Pathian thu bakah a tlakna leilung mihring nihphung (anthropology) hi an hmuh hmaih thei lo. Anthropology lairil ber pakhat chu culture a ni a, culture laiding chu ṭawng hi a ni. Pathian thil rel dan, Pathian thu leh pianpui ṭawng inlaichin hnaihzia an hmu ṭhin a ni. Educationist leh puithiam ni kawp Juan Amos Comenius chanchin kan hria em? Martin Luther pawh protestant a nih thu kan hre hlur a, pianpui ṭawng hlutsaktu (advocate of mother tongue) a ni tih kan hre tel lo em ni le?

Mi dik, mi tak leh mi nghet nih theih nan ṭawng bulṭhut neih a ṭul a. Chutianga ṭawng bulṭhut nei turin naupang chuan ṭawng pakhat (chhungkaw ṭawng) ngeiin lehkha a zir phawt ang a, ṭawng dangin a pawlh rih tur a ni lo. Sikul hmasa ber chu chhungkua a ni a; chumi chhungkaw ṭawng ngeia naupangin primary education a zir zo a nih phawt chuan thil awmzia man thiam theihna tur ṭawng bulṭhut ṭha tak a lo nei tawh dawn a ni. Chumi ṭawng bulṭhut, amah leh khawvel a hmuh fiahna hmasa ber hmang ngei chuan Pathian pawhin rawn biak a duh a ni, an tih ṭhin laia keini’n Presbyterian English School-te kan han bawh viau mai hi chu(h), a chhim thlang sial deuh tlat!

Hnam hla phuahtu Rabindranath Tagore-a sikul, Pi Indira Gandhi pawhin zirna bul a ṭanna Shantiniketan te, Hnam Pa Mahatma Gandhi-a Basic Education-te pawh pianpui ṭawng chawimawina hmun vek an ni. Kan tu leh fate tan thinlung buk lung hmang dik thei thiamna tak tak kan duh a, kan hnam hi dam zel se kan ti a nih phawt chuan, primary education-ah hian ṭawng dang tel lovin Mizo ṭawng chauh hmangin lehkha an zir tur a ni. Chumi hnu-ah ṭawng dang zir se, an zir dan a dik phawt chuan an thiam thei zawk em em a ni.

Mizote hi i ṭhang harh ang u. Hnam ṭhenkhat (Africa leh Asia ram ṭhenkhat) an lo tlakhawlh tawhna-ah kan tlak pil ve hma hian i kir leh ang u. Hmasawnna pawn thlum tuam mawi chawp leh tlereuh tawktarh vang mai mai hian nun chhungril leh hnam hrualhrui tihchhiat i phal suh ang u. Zirna hi mahni hma sial zirna mai a ni lo ve!

Zirtirtu zahawm, khawi lam kawng nge maw i zawh tak mai le? I kawng zawh mek kha i chhut chiang em? Nang kan mi thiam, lo tho chhuak teh. I hnam hian chhantu a mamawh ta e. Tute emaw thil hre tlem at huai boruak so sang mai mai hi hlau suh. I hnungah mi kan awm e. Lam ṭang tam tak i nei e. Hnam tan thu sawi la, mi tinin lo ngaithla ṭheuh rawh se.

- L.B.Tluanga