Kristiante venhim tiamtu Donald Trump

Khawvel thununtu America ram chuan President an thlang leh dawn ta a. Republican party aṭanga President candidate nih tum zinga lar ber leh thawm na ber Donald Trump chuan “Kristiante humhalh leh venhim tlat” a tum thu a sawi a, “Bible hi lehkhabu ṭha ber a ni” a ti bawk. America hi ram ropuia siam leh a tum bawk a ni.

America President-a tlin beiseiawm ber pawl zinga miin hetiang thu an sawi chhuak hi Kristiante tan chuan a thlamuanthlak hle. “Khawvel hmun hrang hranga Kristiante hian beih an tawk reng a, kristiante hi kan venghim tlat dawn a ni” a ti a ni.

A sawi ang ngei hian khawvel hmun hrang hrangah Kristiante hian beih an tawk reng a, India ramah pawh Kristiante chunga tawrhna vawi tam tak a thleng tawh a, a thleng mek zel zawng a nih hi.

Donald Trump-a hi America President-ah hian tling ngei sela, khawvelah hian Kristiante hi kan him deuh ang a, Kristianna pawh hi chawisanin a awm deuh ngei ang. America ram pawh kan ral hriat angin Kristianna a tlahniam nasa ve hle niin a hriat a, Kristianna dodaltu an tam tawh em em a ni.

America President ni tawh rorum zet mai, America President zinga ropui ber pawl Ronald Reagan-a khan President a chuh lai khan “Khawvelah kristianna kan chawisang tur a ni” a ti a, Kristian President ṭha tak a lo ni ta reng a ni. Donald Trump-a pawh khu President-ah rawn tling ve ta sela khawvelah kristiante thlavang a rawn hauh na ve viau dawn a, chu chu khawvel puma kristiante tan a thlamuan thlak dawn em em a ni.

Donald Trump-a khu America President atan a tlin theihna tur chhan pawimawh tak tak a awm. America-ah khuan party lian tak pahnih; Democratic Party leh Republican Party a awm a. Tuna President ni lai Barrack Obama khu Democratic party a ni a, term hnih a chelhna a ni a, thlan nawn theih a ni tawh lo.

America dan tlangpuiah President a thlan tlinte khuan term hnih an chelh deuh ṭhin a, term hnih an hman zawh meuh chuan party danga mi an thlang tling leh deuh zel. Tunah pawh Democratic Party hun a liamin Republican hun a ni tawhin alang.

Donald Trump-a hi tunah hian Republican zingah chuan a la sang ber zel rih a, an party candidate a chan hmel viau a ni.

Democratic Party lamah Hillary Clinton-i a sang pawl a la ni rih a, ani hi term hmasa lam pawha lo chuh tawh, tling zo lo a ni.

Chu bakah Demo-cratic lamin term hnih an chelh mekna a ni a, mipui lamin sawrkar an 'change' a rinawm bawk si a, Donald Trump-a tan President tlin theihna kawng a inhawng zau hle niin a lang.

- Sanga Ralte

Luangmual Vengthlang