Ration Card buaina

Sorkar hmalaknain Mizoramah Food Security kalpui ṭan a ni a, hemi atana pawimawh tak Ration Card thar kan nei ta vek mai. Thil thar kan lawm angin tun ṭum chu lawmna thinlung kan pu thei lo a nih ber hi. A chhan chu kan pianni leh thla, kum leh chhungkaw inlaichin dan dik lo lutuka tarlan a nih vang a ni. January ni 1 a piang kan ni ta thut a, hriatthiam har kan ti a; a theihna zawn zawnah kan phun ta a ni.

Ration card hluiah khan kum dik taka ziak a awm lem lo, kan phunnawi leh hauh si lo. Nula senior kum 30 tling tawh pawh kum 25 te an nia, document/ proof ah pawh kan ring mek a ni si. FSA ration card tharah chuan a ni leh thla, kum langin ziah a lo ni ta a, tih dik loh hlek awm kha kan la na ta a ni.

Minister Pu Lal-sawta'n "Mizote hi phunchiar ber society kan niin ka hria" a tih kha a dik hle. Kan phunchiar ang chu! Pianni leh thla, kum dik taka thehluh hnua dik lo baksak a lo chhuak chu tunge lawm taka pawm ang ni? A thuhrimah Food Security Act kalpui a nih dawn khan computer thiam za chuang lak an ni a, khangho khan an bialte kha dik takin an dah lut lo tihna em ni?

Mipuite tihsual ni loa department tihsual a nih vangin Card siam ṭhat a lo chhuah hunah a thlawnin kan dawng tawh tur a ni ang. Tihsual tam lutuk kha tihluih nge ngaihthah vang zawk? Semchhuah hmain emaw a soft copy ang khan proof a ni lo em ni? Inhrang chang tawh, ration card hluia paih tawhte pawh an rawn awm leh nual hian data/ document hlui deuh a mi kha rin a ni ta em ni tih a awl viau.

Ration Card tihdik tumnaah mi 30,000 vel zet paih an nih thu sorkar hotuten an sawi fo a. Mahse, inhrang chang tawh leh thi tawh, an awmna ṭhin chhungte pawhin an paih tawh an awm let leh hian awm double a siam nual tho dawn niin a lang. Tun aṭang chuan sorkar hi mi zawng zawng thleng phak hna-ah fimkhur tawh rawh se.

- Zoramsaia