Pathian thu aiah Sawrkar dan aw
Eng ngati nge kan ram ve hi, ringlotute kaihhruai State aia kan retheiha kan intodelh loh bik? Kan ram hruaitu leh sawrkar department-a thawkte zawng zawng deuhthawin Pathian thu nia an ngaih an sawi chamchi a. Politics khawvelah ni se, Pathian thu nen an chawm pawlh kâwi nuaih a. Kan hotute Pathian sawi hi Lal Isua'n a rawng a bawl, Pathian nung kha a ni ve lo em ni?
Biak Inah te hian thu ṭha nia kan ngaih hlir kan inzirtir a, sual do turin kan infuih tawn ṭhin. Bible pakhat ring kan ni nàin, Bible zirtirna kan nunpui lem lo a ni ang chu, Pathian thu sawi nasa ber State hi heti té mai hi kan la nih si hi!
Sawrkar department tam zawkte hi thlir ila, mahni inhaivurna tur remchanna zawng ngat ngat, remchanna awm remchang chu bawhpelh hauh lo, che chat ṭhinte hian ro an rel a. Duhamnaa khat awmkhawm, pamhamna tinrengin a bual âtten thuneihna an chelh a. Ram chu e, hnuai-tiangah, an ngaihtuahnaah ram rawngbawl hna a leng pha lo.
Kan minister lal ho te lah chuan e, ram an hmangaih lo tih hriat em emin an inhaivurna tur ringawt an buaipui a ni ber a. An hmakhaw ngaia an chèt chiamna kawngah chuan ram tana pawi tur leh ṭhangthar lo la awm turte tana pawi tur pawh an pawisa zo hleithei tawh lo. An che bawrh bawrh a. Sum an inchuh a, hlep tam tak neih tumin hlàwkna an insiam a. Rem leh rem lovin, a mawi leh mawi lo pawh thlu lovin an ban huam huam a ni ber e.
Chutiang leng vel karah chuan mi ṭha tlem te, tlem fahran hi an awm ve a. Chu'ng mi dik leh thil ṭha duhte erawh zawngin engmah an ti thei lo. Thuneihna hmang sualten an duh danin an hnûk hrawih hrawih a ni ber. Mi dik tlem te, thurualpui nei lo, lal ber pawh ni si lo tan chuan tih theih a awm tak tak ṭhin lo. Chu chu kan ram, Zorama sawrkar awm dan a ni.
Chuvang chuan, Pathian thu hi sawi sawi tawh lovin sawrkar dan awmsa hi zawm mai ila. Sawrkar dan ṭha tak tak awmsate hi Bible nen pawh a inrem hlawm teh a nia. Mahse maw, kan hotute Pathian thu sawi ang chu Bible-ah inziak ve tho mah se tu mahin an zawm si lo. An Pathian thu sawite hi sim hmak se la, sawrkar dan awmsa hi kengkawh mai ang u hmiang!
Sawrkar dan dinglai kan neihte hi tha takin kengkawh ila chuan sawrkar ṭha tak a ding dawn chiang a ni. Thàwka phita Pathian thu kan sawi ṭuah hum hian ram a ti ṭha miah lo tih a lang chiang ta hle mai. Chuvangin, kan ram sawrkar dan dinglai te hi Biak In lamah te pawh hian inzirtir chho tawh mai ila hma kan sawn zawk lo maw? Biak In pawn lamah phei chuan a sawi pawh sawi hlawm tawh lo mai teh se.
Prevention of Corruption Act te, Conduct Rules te, General Financial Rules te, Procurement Rules te, RTI dan leh dan dang pawimawhzualte hi mipuiah tlangaupui tam ila. Kohhran Sunday sikul leh beihrual thupuiah te hian han inzirtir tam ta ila. Mipui nawlpui hian he lam hi hre tam se la, kan ṭhatpui ka ring tlat a ni.
- Tawnzauva Jongte