DELHI BORUAK CHHIA LEH LONEITUTE

India rama court sang ber Supreme Court chuan, Punjab loneitute chu an buhpawl/pawl hâl ṭhin ti tawp turin November 7, 2023 khan thu chhuah a siam ta rup mai. He court thutlukna hi a khawng angreng khawp mai a. "Eng tia tih tawp nge in tum kan hre lo, mahse pawl hâl hi in ti tawp nghal ngei ngei tur a ni," tiin Justice SK Kaul bench chuan thuchhuah an siam a ni.

Thlasik rawn inṭan aṭang hian India ram khawpui ber Delhi chu, boruak chhia avangin an nun khua a buai ṭhin a. Sikul khar ngai khawpin boruak bawlhlawh leh khû hian a bawh chûk a. Mihring hriselna, a bikin naupangte tan phei chuan hlauhawm leh pawi khawpin an boruak a bawlhhlawh ta ṭhin a ni. A chhan tam tak awm thei zinga an boruak tibawlhhlawhtu ber nia ngaih chu; Punjab leh Haryana loneituten an pâwl an hâl (stubble burning) hi nia ngaih a ni. Heng loneitute tan chuan an pâwl hâl hi tihmakmawh ang deuh thaw a ni thung.

Punjab-ah hian an buh hi October thla tirah an seng fel ṭan a. Hemi zawh veleh hian wheat ching leh nghal turin an leilet-te an buatsaih nghal a ngai ṭhin a. Wheat-te hi November thla tir lamah an chin leh nghal a ngai a. Hei avang hian kar hnih ṭha ṭen ṭawn chiah inbuatsaihna hun an nei a. An leilet-te wheat ching tura tifai tur-te, a bawhtu rannung then faite a ṭul a. Tin, hâl fai mai hian hun a heh loh mai piah lamah senso a tlem em em bawk a. Chuvang chuan an pâwl-te hi hal loh theih loh a ni ve bawk a ni.

Pâwl hâl hian economic lamah nghawng a ṭha zawngin a nei a. Mahse, a chhehvela cheng, a bikin North India-a kan ram khawpui liante boruak a bawhhlawh phah nasa thung si a. Loh theih lohin tuar zawk zingah tuar nep tur zawk emaw, hêl theih kawng awm zawk an zawng ta a ni, ti ila a fiah ber awm e. Loneitute hmakhua hi Supreme Court hian a ngai lo a ni lo. Mahse, tha an sen belh hlek khan thil ṭha zawk leh kan ṭhat tlan theihna tur zawk chhuak tur a awm a. Chu lam kawng chu zawh an duh tihna a ni.

Kumin fur lai khan Delhi khawpui chu Yamuna lui kuang liamin a tibuai a. India ram khawpui berah tuilian avangin an buai mup mup mai a nih kha. Delhi khawpui master plan hmasa ber hi kum 1962 daih tawha duan kha a ni a. British architect Edward Lutyens khan, Bristish ten India ram khawpui atana Delhi an siam khan Yamuna avanga tui lian lo thleng thei tur hi a lo hmu lâwk daih tawh a. Yamuna lui kuang hi a liam a nih chuan, a lehlamah tlang (ridge) a awm bawk si a. Delhi hi tuilian leh malaria nasa taka tuar thei an nih avangin khawpuia siam leh loh mai kha a duh rum rum a. Mahse, King George V khân a lungphum a lo phum hman tawh bawk si avangin tih danglam chi a ni tawh lo a ni. Tuna an tui chhe paihna (drainage system) neih hi kum 1970's chho vela ruahmanna, mipui nuai sawmthum aṭanga nuai sawmthum panga vel dâwl zo tura duan a ni a. Mahse, tunah hian mihring nuai zahnih vel he khawpuiah hian an cheng tawh si a. Yamuna lui a lo lian nen, tui lian buaina hi tuar lo thei an ni ta lo a ni.

Kan hmalam hun kan thlir hian, kum hnih khat lek kan thlir chuan kan thlahte hian an la rawn tuâr zel dawn a. Mizoramah hian tunah mai pawh khaw lum leh lui tui nû leh lui tui kang chat kan buaipui ta fo a nih hi. Vawiina kan inthlahdahna hian kan thlahte-ah eng ang taka nasâin nge nghawng chhia a neih ang, tih hi kan ngaihtuah a va ṭûl em! Kan khawpui Aizawl hi, kum zâ dang lo kal leh ta sê, engtin nge kan khawsak ang? Aizawl aia khawpui chen nuam lo, lirthei tâwt, thil man to leh leimin nasatna hi awm tak maw? Khawpui plan ṭha zawk neih ngamte hi kan mamawh ta hle mai. Chhiatrupna lo thleng thei hrang hrang aṭanga kan hîmna tur lah kan ngaihtuah bawk si lo.

Kan thlah lo kal zêlten min dem loh nan, eng zawnah pawh kohhran lamah te, sawrkar lamah te, plan mumal kan neih a ṭul a. Kan ram leilung leh ramngaw kan dûat a va ṭul ta em. Chutih laiin Mizoramah hian mi tam takten kan Environmentalist-te ṭhahnem ngaihna kan hmu thiam lo fo ṭhin a. Kan chhiatna duh ngawr ngawr emaw, harsatna min thlen tum hmuhin kan hmu fo ṭhin. Mahse, he ram hi kan hmangaih a, chîk zawka kan thlîr duh a nih chuan, thil tê ber anga lang aṭangin kan fimkhur chhoh a ngai a. Mahse, chu kawng ṭha zawk kan zawhna avang chuan lo tuar tawk erawh kan awm a ngai si a ni.

Kan rama kawng laitu leh development hna hrang hrang rawn thawktu tam berte hian min vei teh chiam lo. Kan ramah hian sum siam vat vat a, haw leh daih hi an tum ber a ni. Chumi kawngah chuan sum thlauh tlema zawng an neih ìt hian, a ram neitute hi insual mah i la pawi an ti teh chiam dawn lo. An thlah lo la kal zêl turten tuar ve dawn hek lo le. Mahse keini chu kan lu phumna tur, kan thlah lo kal zelten thawk tur boruak thianghlim an neih theih nana thawktu, kan tu leh faten luite lui tui thiang an dawn ve theih nan-te leh, sava hram mawi tak hre chunga hlim taka an rawn nuih ve awr awr theih nan beitu kan ni si a.

Mahse, thil ṭha zawk a chhuah dawn chuan, tha tlem sen belh chang te, kan sum hmuh tur a îp chang te, kan tawrh ve hlekte a ngaih chang a awm fo dawn. Mahse, heng zawng zawng hi kan kal pelh hunah chuan, "Kan zotlang ram nuam hian chhawrpial rûn" a iang leh ngei ang.

- Lalmuansanga Khiangte (Abigail-i Pa)