MPF an fakawm takzet
Mizoram inthlanpui kan zo a, harsatna lian tham thleng a awm lo niin ka hria. Vote thlak ṭhat ngaihna hmun chu awm mah se buaina leh harsatna lian tham thlen vang ni loin, thil dang vang zawk niin a hriat–Mizoram pum kan thlir chuan intlanna felfai leh muanawm tak kan nei niin a lang.
Mizorama inthlanpui ṭha taka kan neih theih chhan hi kan zawng a nih chuan chhan hrang hrang a awm thei ang a, hna thawk ṭha leh fak tur tam tak an awm ngei ang, chung zingah chuan Mizoram People's Forum (MPF) hi sawi hmaih theih an ni lo.
MPF hian inthlan hma khan party tin hruaitute a ko khawm a, ngenna siamin sum leh therhlo hmanga che lo turin a ngen, party hruaitute pawhin hming ziah hnanin inremna ṭha tak an siam thei a, hei hian kawng hrang hrangin nghawng a nei ngei ni pawhin a lang bawk.
Zonet lama MPF hruaitute an kawmna kha la lo en ve a, an hruaitu pakhat chuan MPF kalphung leh an hmalakna te chu sapṭawnga ziakin Election Commission of India (ECI) hnenah a thawn tih a sawi, hei hi thu lawmawm a ni. ECI hotu lam pawhin state dang tana entawn tlak leh thil ṭha nia an hriat thu ṭawngka in an sawi niin a sawi bawk–state dangin a ṭha zawnga Mizoram min hriatna pakhat chu MPF hi a ni ngei mai.
Ti ve khang lang ila, kan naupan deuh lai kha chuan MLA thlan lai hian party hla an play a, khawlaia zurui lam leh che vel hmuh tur an tam thei hle, khawtiang boruak lo ṭhanhnan ve hman tan chuan boruak reh duk hnuaia inthlan chu a lunglen thlak zawk letling viau.
Hla play leh hlim leh lawma lamte hi a la reh vek lo, mahse party hrang hrangte hian campain-na hmunah Pathian fakna hla an play nasa a, mipui lam pawhin hlim leh lawm takin Pathian fakna hla kan sa leh mai a, duhthusama dik leh felfai vek chu ni thei chiah lo mah ila, kan thlen china kan chet dan leh che vel hi a hmuhnawm viau a, hei hian rah ṭha a chhuahin kawng dikah pawh min hruai ngeiin a rinawm.
Inthlanna felfai kan neih theih nan MPF te hnathawh a ropui a, chutiang bawkin an ngenna zawmsaktu party tin candidate-te an fakawm em em bawk. Candidate tan chuan sum hman tlemna tur MPF hmalakna ringawt pawh hi lawmna tur a ni, inthlan atana sum leh pai senso a hautak lutuk chuan an tlin hnuah an senso phuhruk leh nan loh theih loha an chet ve leh a ngai ṭhin, hei hian ram hmasawnna hna thawh kawngah nghawng ṭha lo a nei ṭhin. Inthlan senso a tlem erawh chuan eng mi pawh lo tling se la atan hmalak leh hnathawh a awlsam phah ngei ang tih a chiang.
MPF hi tute ta nge ni a, tute nge MPF kan tih chuan Mizo mipuite kan nimai–a bik takin inthlan niah chuan Kohhran Ṭhalai leh YMA lamin mawh an phur nasa a, anni hian kawng hrang hrangin election duty-te hna thawh an tih awlsam phahin, damlo leh harsatna nei tan pawh an thlamuanpui awm hle tih a takin kan hmu.
Mizo ṭhalaiten politics an ngaihven tiin kan sawi ṭhin, a dik viau mai. Ṭhalaite hian kan sam rorelna awmdan leh a chet phung hi kan ngaihven tur a ni reng a, kan ngaihven lehzual zel pawh a ngai. Tunlai ṭhalai zingah party politics ni lo ram politics ngaihven an pung zelte hi lawmna tur a ni, anni hian rilru fim chungin ram rorelna an ngaihven miau chuan Mizoram hian hmabak eng tak a nei tihna a ni.
- Sanga, Aizawl