Zirlaite leh social media

Social Media hian kawng hrang hrangin kan nunphung a thlak danglam nasa em em a, hmasawnna tam tak a ken tel rualin kan khawthlir pawh a her danglam ta hle. Tunah chuan Social Media vangin tuipui ràl lama thil thleng pawh rei lo téah kan lo hre ve zung zung thei ta.

Kan Pi leh Pu te hunlai a zualko kal a ngaih ṭhin lai ngaihtuah chuan he thil hian kawng hrang hrangah thil a tiawlsam a, he thil hi kan hman thiam chuan zirlaite tan pawh zirnaah nasa takin a pui thei a, sumdawnna'n pawh a ṭangkai tawh hle a ni.

Tunlaiah social media platform hrang hrang kan hmang nasa a, ṭhalaiteah ngat phei chuan nghawng a nei lian hle a ni. Kan nihna bak baka lan kan tumna avangin rual awhna sualah ṭhalaite a hnuk lut nasa em em a, social media platform pakhat; ṭhalaite hman nasat tak Instagram phei hi chu ṭhalaite lemchanna tualzawl a ni ringawt tawh.

Social media-a kan lemchanna hian tu emaw chu rual awhna avangin hruihrual a chuhtir ṭhin. Hei mai bakah hian internet kaltlanga mi bum ching tam tak an awm a. Mizo zingah cheng nuai tam tak chánte pawh an awm tawh nghe nghe. He social media hian kan value system min thlaksak a, kan ngainat zawng min thlaksak bakah kan ṭhian kawm duh zawngte thlengin min thlaksak.

Social media hi mobile phone/smart phone aṭang hian kan khawih deuh ber a, heng smart phone te ngat phei hi chu thil man to a ni a, thawhchhuah nei lo zirlaite tan ngat phei chuan chhungte lakah insenso kan ti tamin kan ti hah ṭhin hle mai.

Zirlaite tan social media hi information dawn nan kan hmang ṭangkai em em a. Internet-ah hian thil engkim a awm emaw tih mai tur a ni a, kan zirlai min pui thei tur pawh a awm kim hle.

Kan nu leh pate hunlaia Library-ah harsa taka an zirlaia ṭangkai tur an zawn ṭhin kha, keini chuan kan kutphah maiah kan hmu zung zung thei ta a ni. He khawvel thiamna leh finna hmang ṭangkai bertu chu zirlaite hi kan ni. Smart phone bàwiha min ṭantirtu a nih chuan social media hi a uchuakin hmang lo ila, social media hi min timualphotu leh thatchhiatna kawnga min hruaitu ni lo a, finna leh thiamna min petu atan ṭhalaite'n hmang ṭheuh ang u.

- Abisak Lalrammawii; J. Vanlalruati; Esther Lalnuntluangi
ICFAI University, English 1st Semester