Thawven khat chuan a veng ta

Mizoram inthlanpui chu kan zo dâwn taa a vote thlak lam kan zoa a chhiar lam kan la hmabak a, phak tawk te te review pahin duh duh han sawi ve ta ila. Kan review hian chak tur inrinsiak ni lovin kan kal tawha campaign dan, thil fel leh fel lo te han sawi ve dawn ang hmiang.

Inthlan campaign hi thiam dan inang lo tak a ni a, a chhan chu sorkar behchhan leh behchhan lo an awm bawk a. Pawisa sem tih te hi a takin a lo la awm thei a, MPF huaisen zawk kan neih a ṭha khawp mai tih hi ka review No. 1 a ni.

MPF hi huaisen se chu pawisa sem hi tih tawp theih a ni. Pawisa a sema sem duh ngat hi mi an tlem tawh a, chuti chung chuan Aizawl khawpuiah pawh veng ṭhenkhatah hian a pawisa faiin an la sem. Tin ṭhenkhat chuan a coupon ang zawngin an sem tih a ni bawk, thingtlang kil khawr pawh ni lo, Aizawlah pawisa fai an la sem chuan ṭan a ngai a ni. Tu pawh tling se a sawhkhawk hi Mizoram hian a tuar zel dâwn a, Aizawl East lam veng ṭhenkhat te, Aizawl West lam te pawh pawisa fai an la sem ngam tih a ni.

Pawisa sem bakah hian zahthlak deuh deuh pawisa tam uchuak taka inthlan dawn hnaia damlo kan an sawi bakah mitthi ral an awm. Hei bakah hian Sintex sem, puan ṭhui khawl sem te; in hmun sem te pawh a awm a, inthlan dawna mipui vote leina atana sorkar sum leh thiltih theihna an hmang duh hi chu sim tur a ni. He boruak hi kan ram tan a ṭha lo, tu mahin ching chhunzawm tawh suh se.

Inthlan hian kan zavai hian kan ṭang a, kan ṭan dan hi inang tlang se, mipuiin an duh lo thlang se tu party mah an na lo va, tu mah hian advantage an nei lo va, sorkar lam nih vanga sorkar pawisa leh theihna hman hi tih tawp a nih loh chuan 2028 inthlan hi a huphurhawm.

Thingtlang lamin voter an phurhna pawisa hi a tam hle a, Aizawl aṭanga bial hla hian voter phurhna pawisa hi an seng nasa a. MPF hi huaisen lehzual se, chu chu kan innghahna a ni. Tunah chuan thaw chu a veng ta phawt a, inthlan zawhah hian buaina awm lo se, Krismas ruai kan ṭheh dial dial dawn a nia.

- Vanlalliana