WELCOME TO CM THAR

A KAMKÊUNA

Mizoram State Assembly inthlanpui rah (result) seng theih hun thlen hmain ni tam kan nei ta lo. Kan dam tlang a nih phawt chuan kar lovah a rah chu kan seng thuai mai dawn e. Political party 5 leh independent 27-te chuan buh ṭhat duhna leilung ṭha tak takah buh chi an theh ṭheuh emaw an intih laiin, an buh chi theh chu a ṭhen kawng dungah te, a ṭhen hnim hling nei zingah te, a ṭhen pialtlep lei pan hmunah te, a ṭhen lei ṭhaahte a tla a, a tlakna leilung a inang lo zung mai! An lo ṭo sang a, an ṭhan dan leh rah chhuah dan pawh a inang lo hlawm hle. A ṭhen chu hlawk takin an rah a, a ṭhen an ngêt a, a ṭhen seng tlak lohvin an vuai a, a ṭhen a sí an ni a, an rin ang hehu chuan an seng hlawk dawn lêm lo a nih hmel hle.

INBUMNA NI CHU?

Mizote hi langtlang taka thu sawi chiang ngam lo, pehhel theih dan dan zawnga thil sawi ching, thu khuh ching, mahni nihna baka insawi ching kan ni tlangpui niin a lang. Nov. 7, 2023 vote thlak ni pawh khan mahni party vawn laia rinawm lo, a rûka party danga Uire mi eng emaw zat an awm rualin party bik ngaihtuah lem lo, pocket money pe tam theitu apiang vote mai ṭhinte an awm nual bawk a. A ṭhen chu an chhung hnaivai leh hmelhriat ṭha candidate zingah an awm avanga mahni party vawn lai phatsana mi dang vote ta daih pawh tam tak an awm niin a hriat theih. Voters-te titi leh kamchhuak ka hriat ruk ṭhenkhatah chuan "Chu mi kha mi party-te chuan anmahni vote tur ka ni emaw tiin taxi/motor-in min rawn lam a, mahse, anmahni ka vote tawp si lo va," tih te, "Chu mi kha mi chuan sumo chuan man leh pocket money min pe a, mahse, mi dang ka vote daih sia," etc. tih thawmte ka tawng nual mai. Sapho leh hnampui, hnam fing zawkte chuan zêp nei miah lovin tlang (Frank) takin an nihna leh an duh zawng vote tur an sawi lang hmiah hmiah ngam ṭhin a, an fakawm hle. Keini erawh kan mizia a danglam hle a. Mahni vote tur ngei hre chiangsate pawhin an zêp ṭang ṭang zel ṭhin a ni. Chuvangin, political party hrang hrang candidate-te leh independent candidate-te hian vote hmu tura an inbeisei zat an hmu hlawm lo mai thei. Minister chelh mek pakhat leh ruling party MLA ni lai mek dinna biala mipui sukthlek dan chiang taka lang thei pakhatah chuan, mipui voters tam tak an party mi leh sa ni reng siin anmahni party candidate an vote loh thu Frank taka sawi hmiah hmiah ngam an awm nual niin hriat a ni bawk. Politician-hote hian mipui min bum zing tawh êm a, mipuiin an bum ve hun a thleng ta em ni? Chuvangin, vote thlak ni kha chu inbum runpui ni ni berin a lang. Kan ringtu nun dan tur nena khaikhin chuan kan awm dan hi thil mawi tak chu a ni lêm lo hle.

CM THAR TUR CHU?

Inthlan campaign tirh aṭanga a vawrtawp thlengin, chu mai ni lovin kum 2019 aṭanga 2023 inthlanpui thlir lawka sorkarna siam thei ngei tura inbeisei ṭheuh chungin, political party hrang hrangte'n ṭhahnemngai takin ṭan an la ṭheuh a, independent candidate hrang hrangte pawh sorkarna siam turin an inbeisei ve tho bawk. An kalna apiangah, Political campaign-na hmun hrang hrangah, social media chi hrang hrang visual, print or non-print thleng pawhin political party leader tinte'n an sorkar huna an tihdan tur an sawi chamchi a; vote thlak zawh hnu thleng pawhin a ri thangkhawk chuan bengdar a nghawr chhe lo chauh ni berin a lang. Inthlan result kimchang puan a nih hma hi chuan tu nge sorkarna siam ang tia inrinsiak mai bak chu Pa; vana mi chauh lo chuan tu ma'n engmah kan hre lo va, beiseina thuhmun neih hun lai leh inhisap nawm hun lai tak a ni. Chuvangin, tu nge CM thar tur chu ni ta ang tih chu mi tin thinlungah a inzawt su dup dup reng mai chu a nih hi! Mahse, ni rei lote hnuah CM thar chu a lo lang mai dawn a ni. Tunah zawng darthlalangah kan hmu riai ruai a ni, chutih hunah erawh chuan CM thar nen inhmatawnin a ni tawh ang.

A TLANGKAWMNA

Sorkar thar siam tum ṭheuh, political party 5 leh independent 27 zet an awm a; a ṭhenin, "Kan sorkar chuan development hrang hrang kan tihlawhtling ang," an ti. A ṭhenin, "Kristian sakhua kan humhim ang a, old pension scheme kan hmang leh ang; tar pension hlawh ṭha zawk kan siam ang," an ti; a ṭhenin, "Mipui sorkar leh bana kaih policy kan kalpui ang a, kan eiru ve lo vang tih kan tiam vek tawh a, min enchhin ve mah rawh u," an ti; a ṭhenin, "Pathian leh kan ram tan, a hma aia chak zawkin ram kan kaihruai ang, SEDP pawh kan chhunzawm zel ang," an ti; a ṭhenin, "Zoram thar sorkar kan din ang," an ti; a ṭhenin, "Mizo hnam humhimna zo-nation vaiho thuhnuai aṭanga chhuakin independent nation kan din ang," an ti. A ṭhenin, "Myanmar nena insumdawntawnna zau zawk leh changtlung zawk, kawngpui ṭha zawk, rel kawng awm thei zawng zawng kan siam ang," an ti. An tum dan ṭheuh thlir khian tuate pawh khi CM thar ni dawn ta se, kan Zoram hi khawizu leh hnute tuia luang ram, vanram tlafual lei eden mi ramin a tluk rual loh kan ni thei ngei dawn niin a lang. A va nghahhlelhawm tehlul êm!

Mahse, Ministry thar lo ding tura CM thar tur hian political campaign vang laia Zoram mipui hmaa an tiam biahthu di an chham zuah zuah leh, an aupui dum dumte kha a takin an ti leh ngût ang em le?

"Chuvangin, CM thar tur, Zoram mipuite'n thinlung leh tihtakzetin kan lo làwm láwk (welcome) che a, mahse, i lalṭhutthleng i hûn hunah; khatiang taka Zoram mipui hmaa i thil tih tur i au chhuahpui kha theihnghilha i hlenchhuah leh si loh chuan e, engtik khawtikah mah kan ring leh tawh ngai lo vang che a, kan Zoram aṭang hian kan hnawtchhuak hial lo vang che tih pawh sawi theih a ni lo, tih i lo hre lawk dawn nia," tiin Zoram ṭhatna tur ka duh luat vangin ka tawnmangah ka lo vau lawk che a ni tih i lo hre dawn nia.

- Dr. C. Lalrampana