2023 MLA RESULT KA THLIR VE DAN
Kum 2023 MLA inthlan Vote chhiar hun tura ruat tihdanglam a nih loh chuan ni 3 Dec, 2023 (Pathianni) ah MLA Bial 40 result hi chiang kel kawlin kan la hre turah ngai ila; a hun lai a ni bawk a, 2023 MLA inthlan result ka thlir ve dan kan han bengchhenpui ve mai mai teh ang.
Sawrkar Flagship Programme langsar tak SEDP hian A/C tinah power a nei a nih ngat chuan, MNF Party-hian tuna sitting MLA an neihte hi an dinna bialah ṭheuh hneh takin an tling leh vek ang a; heng bakah hian Bial 4/5 la lak belh hial thei an ni bawk. A chhan chu - Unit tina Party member-te hnenah SEDP ₹ 25,000/50,000 an pek mai bakah, party dang mi leh sa chhungkaw eng emaw zatte chu SEDP (25,000) dawng tura membership fee pein Party-ah lawmluh an ni a, an dawntir ngei bawk! Hetiang a nih chuan an mi leh sa nghette bakah party dang aṭanga chhungkaw eng emaw zatten SEDP an dawn miau avangin, SEDP khan power a nei a nih ngat chuan hneh taka sawrkarna an siam leh mai nàk lo vah! (Kan Unit/bialah ṭheuh SEDP khan tun inthlanah eng tiang chiahin nge power a neih tih erawh chu kan ngaih dan dan ni se).
Hemi pangkhing chiah SEDP khan power a nei lo a nih vaih zawngin, MNF Party-te hian Bial lak belh chu sawi loh, an sitting MLA te hi chán duak thei an ni. Chutih laiin, an insawi anga ZPM thli hi a lo tleh tak takte a nih phei chuan, MLA 5/6 lek nei thei an ni tlat!
Cong. party-ten beng lo chhu ngawng se, ram pum politics boruak han thlir thuak hian, mipui nawlpuiah Cong. Party hian sawrkarna siam turin ngaihzawn a la hlawh chhuak zo meuh lo ni hian a hriat a. Bial thar beisei awm 1/2 an neih bàk chu, bial him an neihsate pawh hi chán ṭhen thei dinhmunah an ding em aw? a tih theih.
BJP lam hi thui tak han seprawtui tur awmin a lang hran lo. Amaherawhchu, MLA neih ve hrim hrim hi an target a nih miau avang leh "Chhura duh loh Naa'n nei na nge", tih ang deuhin, tute emaw duh tak loh a khaw chhuahnaten thangchhuah diar an lo khimtir tak si kha, an candidate pakhat a ni ta mauh mai si a; MLA 1 zawng an nei ngeiin a rinawm.
Hetiang a nih avang hian 2023 MLA inthlan hi chu kil thum aṭanga na taka inbeihna nia a lan lai hian, final match hi chu MNF Vs ZPM a tih theih awm e.
Bial tina inbeihnaah, "MNF leh ZPM hi an intiat lutuk, chak zawk tur hriatthiam a har," an tihna hmunah chuan, vote hi chhiar ni ta se, hnehna sang filawr vak lovin ZPM-in hnehna an chang deuh zel mai awm mang e, ka ti! Hetiang hi a nih chuan 'Sawrkar Thar' hrawn thei dinhmunah kan ding ve reng!
Engpawhnise, hei hi ka mimal ngaihdan leh thlir ve dan a ni mai a, inthlan a zo tawh bawk a, tu party tan maha han chhiatpui emaw ṭhatpui tura awmze awm tawh chuang lo a nih avangin, hlauhthawn leh venthawn nei miah lovin, he thlasik hun inṭam chho mekah hian ka rawn thlasik thlawbaw leiten mau puah keh ve phawk phawk a nih hi!
- Tluangtea Hnamte