PATHIAN NIA VOTE CHHIAR THLIRNA TLANG DANG

Election Cimmission in inthlan ni leh vote chhiar ni a puan aṭanga kan ngeng chhun tak pakhat chu, Decmber ni 3, Pathian nia vote chhiar chungchang hi a ni awm e. Kohhran hruaitu lam leh party lam pawh an vir vat hlawm a. Kohhranin a ngaimawh dan leh Party ten an ngaihmawh dan chen erawh chu a inchen kher lo maithei e.

Engpawhnise, kar khat chhung ni sariha ni khat chauh awm ‘Pathian ni’ tak maia a han tla fuh hi chu, ni dang a tam tehlul nen, a huatthlala viau mai a, sawn leh theih ni se a duhawm khawpin ka hria. Mizo mipuite chu Pathian nia kan vai deuhthawin biakbuka kal mi kan ni a. Hemi nia fiahna ṭul lo tak hmachhawn kher hi, pumpelh theih a nih chuan pumpelh a duhawm hle. A thawktute chauhin vote chu an chhiar thei khawp ang a, mahse, inthlang ram kan nih anga kan hun pawimawh tak mai a nih avangin, mi tinin beng kan chhi lo thei lo. Inkhawm nena buk tur ni ta se la, kum nga dana thil thleng a ni a, inkhawmte chu hun dang a tam a lawm tih theih hial khawpa ni pawimawh a ni tlat a ni.

Nia, a enga pawh chu lo ni se la, ka han sawi duh zawk tak chu, mi tam takin a titute rilru kan zuk puttir dan erawh hi chu, kan rin ang em em a ni lo ve thei ang tih lam hi a ni a. Pawl té deuha awm leh ram té deuha awm hi, kan aia lian zawkten ralpui phiarin min phiar ngat ngat emaw tih mai hi awl ve tak mai a ni a. A ram ang te, a hnam ang te hian, kan pu vanlalmodia te hian Gandhinagar lam hawi hman lo lekin min vei ta tlut tlut emaw tih mai theih tura kan han sawi ṭhin te hi chu, kan rin ang em em hi chuan vei thamah min lo ruat lo reng thei ve bawk.

Sunday hi India ram pum puiah kar tin thua holiday kan enjoy rual ber ni a ni hial maithei e. India rama Christian percent tlem téten biakbuka kan kal niah India ram ropui tak mai hi a chawl ṭhup a ni tih te pawh hi ngaihtuah ve atan a ṭha viau mai. Hemi ni hi mipui vaibelchhe tam tak, engmah thawk lova kan chawlhna ni a ni a. Inkhawm lam ngaihtuah ve lem lo mipui vaibelchhe tam tak tan chuan eng emaw ni atana hman hi remchang ang reng tak a ni thei ang. Kan hriatthiam theih nan, keni pawhin vai puja chawlh kohhran hnatlang remchang taka kan hmang ang te nen pawh a tehkhin theih awm e. Hindu leh Mosolman te ni serh pawimawha Kohhran leh khawtlang programme pawimawh kan dah hian, Hindu leh Mosolman te va runral nana kan tih a ni hauh lo, hemi ni hian kan Office lam hnate kan chawlh deuh ṭhuap dawn avang te, anni anga kan hman ve kher dawn loh avanga a remchan vang chauha ti kan ni. Chuti ang chiah chuan, India ram pum puiah Kristian hi kan lan tham lutuk loh avangin, mi zawng zawng chawlh remchan ni vote chhiar ni atana an han dah hi remhria an inti ve viau maithei a nia!

Kan ngaihtuah dan hmang, kan thiltih leh sawi duh zawngte hi kan chenna ram leh sawrkar laka hel záwng ni lo, khua leh tui ṭha ni tura infuihna lam hi ni thei se a duhawm hle. Tun ṭuma chawlhnia vote chhiar tura ruahmanna pawh hi, tum ren rawna ti ni lovin, Kristianten he ni kan hman dan ngaihtuah chang lovin an ruat mai a ni ang; ti zawnga ngaihtuah theih te pawh ni ta se la, ngaihtuahna hrisel zawk a ni ang.

Politics kan khelh danah pawh hian, India khua leh tui kan nihna sawi nghing zawng te, ram hruaitute dodal zawng te, anti-mainstream politics ringawt kan kalpui reng chuan a tuartu chu keimahni hi kan ni fo vang tih a rinawm. Khawvel hian hun thar a kai tawh a, independence tih ṭawngkamte pawh thil ṭhing mai a lo ni ta. Sal tih ṭawngkamte chu he khawvel aṭanga hnawh bo a lo ni ta. Tu hnam mahin hnam anga rahbeh an tawrh tawh meuh loh avangte pawh a ni ang, zalenna sual tih vel thawm pawh hriat tur a vang ta. Mi tin hi an chenna ram ṭheuhah intluktlanna neiin, zalenna neiin, neitu rilru pu theiin an awm tawh a. Racism chu khawvel zawng zawngin an thil duh loh ber, an do ber a nih tawh avangin inlak hranna rilru pu bik nihte hi, rual pawl lohna chi khat a ni ta hial mai a nih hi.

Eng pawh ni se, kan duh zawng leh duh loh zawng kan sawiin, naupang leh ṭhalai lo ṭhang chho mek te thinlunga anti-Indian thinlung tuh lo zawng tur ngaihtuah rana thil kalpui a ṭha hle mai. Hriat sual palh emaw, a effect tur estimate fuh tawk loh vanga thil ruahman sual palh te hmanga, hnam nghawng lawih thei khawpa meisi chhem alh theihna ang chiah hian kan fimkhur a ṭha hle awm e!

- Rev. Jh. Za Hluna (Paula Pu)