Pawisa sem kan ṭhatpui em? tih kha
Vanglaini February 29, 2016 kha kan chhiar hlawm ang a. Khat-ah khan 'Pawisa sem kan ṭhatpui em?' tih thupui hmangin Edito-rial an rawn ziak a.
Editorial-ah hian MNF President-in MNF-in Socio-Econo-mic Development Programme (SEDP) Policy ṭha tak an neih sa tuai thara thuam famkim zual turin an inbuatsaih chungchang a sawina, "He policy hi kut hnathawktute din chhuahna tura chhungkaw pakhat hnenah Rs. 3,00,000 ṭanpuina tura duan a ni. Congress duh loh vang ngawr ngawr ni lo, MNF policy SEDP avangin MNF-in sorkarna kan siam ang" tih a ni.
MNF hian inthlan leh hunah sorkarna siam tumin theihtawp an chhuah mek a. Congress-in term hnihna an hman mek avangin inthlan lo awm leh turah hian anni hi tling leh mai thei dinhmunah an ding thei nia an ngaih avangin mipui rilru hneh tumin theihpatawp an chhuah a. Tunah hian an party elpui lian ber, Congress party flagship programme NLUP doletna tur ang deuha an duang chhuak ta nia ngaih theih turin pawisa sem an rawn sawi mawi ve leh a, he SEDP hi mipui hian engtin nge kan lo ngaih ve hlawm le.
Congress-in NLUP an sem tawh a, tunah hian NLUP avangin Mizoram mipuite hi kan intodelh phah ta chiah em, kan ding chhuakin kan hria em? Nge NLUP sem hma ai khan kan thachhe sawt a, kan rilru hian sorkar aṭanga thilthlawn pek a beisei nasa sauh zawk em tih te hi ka ngaihtuah ṭhin. A zirchiangtuten an ziak leh an sawi kan hre ta nual a; tun dinhmunah chuan Mizo hnam tan hian a thlawna sum sem hian a ṭha zawngin hna a thawk lo a, kan rilru corrupt phah a, min ti thatchhe sauh ringawt ni maiin ka hria.
Tunah MNF party hian NLUP pawisa sem zat aia tam deuh zawk SEDP an rawn chhawp chhuak ve leh a. Thingtlang pa leh khawpui pa tan pawh cheng nuai thum hi a itawm tham viau a, mahse NLUP ang bawkin he pawisa hi a takin sem ta tehreng pawh ni se Mizo mipuite kan intodelh theih nan ṭan min laktir sauh dawnin ka hre lo a ni. A chhan chu NLUP vangin kan intodelh sauh lo tlat; chuvangin sum sem policy hrim hrim hi kan ṭhatpuina tur aiin kan inthlahdah phahna tur chance a tam zawk tlat a ni.
Myanmar sorkar pawh khian mipui hnenah a thlawnin pawisa a sem ngai lo a, an mipuite khian sorkar aṭangin hamṭhatna an beisei ngai miah lo. Inkhawmpui thlen dawn vangin kawngpui siam ṭha turin sorkar an kar ngai lo a, gas leh buhfai a man tlawmin an dil ngai bawk lo; mipuiin pawisa thawh khawmin kawngpui pawh an siam mai ṭhin.
Mizote hi sorkar aṭang pawisa dawn leh therhlo ilo dawn tuma phe phe loin harh chhuak ila. Hmasawn-na ngialnghet zawk neih tumin ṭan i la tawh zawk ang u. Ui ang maia chaw nawi tla chhar tuma mei phet mut mut tawh loin mahni kutkea din ngheh zir a hun e.
- Ramhmangaiha