MLA FUND Vs CBI KOH LUH

MLA fund hi dik lo taka i in chhûngkhura a lo luang lût tawh ṭhîn a nih chuan party ruhin lo ruh deuh ṭung pawh ni la, i dik tihna ni lovin tlêm chuan i la hriatthiam theih a. Luang lût ve si lo, engtin nge an hman tih pawh ngaihtuah lova lo ruh satliah, sahuai thingvawna vuan bur nih hi eng nge a awmzia? Ram hmangaihna tak tak nei lovin, party-ah kan luangliam nasa niin ka hria.

Mimal leh party induhsakna tûr ni lovin, MLA tinte’n an bial chhûng an develop-na tûr a ni a. A awmzia chu, mipui chanai, i chanai a ni ve tihna a nih chu. Term khat chhûng mai lo, kum tin nuai 150 a lo kal a; an hlawh siki pawh sên ngai lovin kum tin he pawisa hmang hian an bial chhûngah hna tam tak thawkin changkânna nasa tak min thlen thei a ni.

Pu Zorama khan, “Kan sawrkâr hunah chuan CBI kan ko lût ang,” a ti a. Pu Thanhawla chuan mahni chauha chhui chu a zuam bîk chiah lo va, “In ko lût dâwn a nih chuan in sawrkâr hmasak aṭangin kan chhuitîr ve ang,” a ti ta a. Koh luh ngam a ni ta lo a nih kha.

CBI ko lût ngam leh chhui tûr la awm ve lo chuan an ko lût thei êm êm ang tih a chiang a. Mipui hi kan dik a, kan eirûkpui a nih si loh chuan lâwm viau zâwk tûr kan ni a. Mipui develop-na tûr kan chanai hi eng zât nge kawng dik lova lo luang ral tih hriat chhuah pawh hi, ram hmasâwnna a ni tih kan hre thiam duh miah lote hi a mak ka ti ṭhîn.

- Têbawihi Pautu, Zemabawk Kawnveng 1